लातूर : प्रतिनिधी
लातूर जिल्ह्यातील सर्व व्यवस्थापनाच्या व सर्व माध्यमाच्या माध्यमिक व उच्च माध्यमिक शाळांच्या मुख्याध्यापकांची एकदिवसीय आढावा व सहविचार सभा पार पडली. यावेळी महाराष्ट्र राज्य माध्यमिक व उच्च माध्यमिक शिक्षण मंडळ, विभाग लातूरचे अध्यक्ष सुधाकर तेलंग उपस्थित होते.
यावेळी शिक्षणाधिकारी डॉ. दत्तात्रय मठपती यांनी विषयनिहाय आढावा घेतला. डायटचे प्राचार्य डॉ. मारुती सलगर यांनी गुणवत्तेबाबत आढावा घेऊन विद्यार्थ्यांची गुणवत्ता वाढविण्यासाठी सर्वतोपरी मदत करण्याचे सर्व मुख्याध्यापकांना आश्वासन दिले. शिक्षणाधिकारी तृप्ती अंधारे यांनी सर्व मुख्याध्यापकांना सर्व कामे विहित कालावधीत पूर्ण करण्यासाठी मार्गदर्शन केले. मुख्याध्यापक संघाचे अध्यक्ष प्रकाश देशमुख यांनी मुख्याध्यापकाच्या शालेय कामकाजामध्ये येणा-या समस्या बाबत मार्गदर्शन केले.
या बैठकीत विद्यार्थी सुरक्षा संदर्भात कार्यवाही करणे, नवोदय परीक्षेबाबत तयारीचे नियोजन करणे, पूर्व माध्यमिक व माध्यमिक शिष्यवृत्ती परीक्षा बाबत विद्यार्थ्यांची तयारी करून घेणे, मुख्यमंत्री माजी शाळा सुंदर शाळा संदर्भात सर्व शाळांनी सहभाग घेणे, तंबाखू मुक्त शाळा संदर्भात निकष पूर्ण करणे, २६ जानेवारी रोजीच्या कवायतीच्या सादरीकरणाचा सराव करून घेणे, इयत्ता दहावी बारावीच्या परीक्षा केंद्रावर आवश्यक भौतिक सुविधांची पूर्वतयारी करणे व परीक्षा कॉपीमुक्त होण्यासाठी सर्व विद्यार्थ्यांनी तयारी करणे, अनधिकृत शाळाबाबत तात्काळ कार्यवाही करून अशा शाळा बंद करणे, माजी विद्यार्थी संघ कार्यान्वित करणे, शाळांनी सीएसआर मधून काही निधी उपलब्ध करून घेऊन शाळेचा विकास करणे, विद्यार्थी व शिक्षक बायोमेट्रिक प्रणाली कार्यान्वित करणे, विद्यार्थी आधार व अपार संदर्भात योग्य ती कार्यवाही करणे, अंमली पदार्थासंदर्भातील जनजागृती करणे.अशा विविध विषयांचा आढावा यावेळी घेण्यात आला. यावेळी उपशिक्षणाधिकारी प्रमोद पवार, उपशिक्षणाधिकारी संजय क्षिरसागर, उपशिक्षणाधिकारी बु-हाण हाश्मी, वेतन पडताळणी पथकाचे अधीक्षक हगवणे, लातूर जिल्हा मुख्याध्यापक संघाचे अध्यक्ष प्रकाश देशमुख, संघाचे सचिव बजरंग चोले व संघाचे प्रवक्ते कालिदास शेळके यांनीही मुख्याध्यापकांच्या अडचणी संदर्भात मांडणी केली. बैठकीचे सूत्रसंचालन सतीश भापकर यांनी केले. आभार प्रदर्शन संजय क्षिरसागर यांनी केले.
