रेणापूर : प्रतिनिधी
रेणापूर नगरपंचायत निवडणुकीची रणधुमाळी सुरू असून भारतीय राष्ट्रीय काँग्रेस पक्षाने नगराध्यक्ष पदासह सर्व वॉर्डातून चारित्र्यसंपन्न व जनतेच्या प्रश्नांची जाण असलेले उमेदवार दिले आहेत. नागरिकांना मूलभूत सुविधा पुरविण्यासाठी काँग्रेस पक्ष कटिबध्द आहे, असे प्रतिपादन माजी आमदार, जिल्हा बँकेचे अध्यक्ष धिरज देशमुख यांनी केले.
प्रभाग क्रमांक ३, ११, १२ व १५ मध्ये काँग्रेस उमेदवारांच्या प्रचारार्थ आयोजित कॉर्नर बैठकात ते बोलत होते. निवडणूक प्रचारामध्ये काँग्रेस पक्षाने आघाडी घेतली असून जिल्हा बँकेचे अध्यक्ष धिरज विलासराव देशमुख यांनी दि. २७ नोव्हेंबर २०२५ रोजी नगराध्यक्ष पदाच्या उमेदवार माने अर्चना प्रदीप, प्रभाग क्रमांक ३-आकनगिरे प्रशांत पुजा, प्रभाग क्रमांक ११- इंदूबाई पुंडलीक इगे, प्रभाग क्रमांक१२- मिनाक्षी भुषण पनुरे, प्रभाग क्रमांक १५- सुजाता बाबू सौदागर यांच्या प्रचारार्थ बैठका घेऊन मतदारांशी संवाद साधला.
यावेळी नागरिकांनी त्यांना भेडसावणा-या विविध अडचणी मांडल्या व नगरपंचायतीने मागील ८ वर्षांत कसलेही विकासाचे काम केले नसल्याचे सांगितले. यावेळी माजी आमदार धिरज विलासराव देशमुख यांनी विकास कामे करण्यासाठी काँग्रेस पक्ष कटीबद्ध असून पारदर्शक प्रशासन, प्रामाणिक काम, सर्वसमावेशक विकास आणि सर्वसामान्य नागरिकांच्या हिताचे निर्णय घेणे हीच आमची वचनबद्धता राहील, असे सांगितले व येणा-या २ डिसेंबर रोजी नगराध्यक्ष पदासह सर्व काँग्रेस नगरसेवक पदाच्या उमेदवारांना निवडून द्यावे असे आवाहन केले. यावेळी काँग्रेस पक्षाचे उमेदवार, पदाधिकारी, पक्षनिरीक्षक कार्यकर्ते, नागरिक मोठ्या संख्येने उपस्थित होते.
