१ डिसेंबरपासून पदभार स्वीकारणार
मुंबई : प्रतिनिधी
राज्याच्या मुख्य सचिवपदाची जबाबदारी राजेश अगरवाल यांच्या खांद्यावर येणार आहे. सध्याचे मुख्य सचिव राजेशकुमार मीना ३० नोव्हेंबर रोजी निवृत्त होणार आहेत. त्यांच्यानंतर १ डिसेंबरपासून राजेश अगरवाल हे मुख्य सचिव असतील. राजेश अगरवाल हे १९८९ च्या बॅचचे आयएएस अधिकारी आहेत. त्यांच्याकडे या आधी केंद्र सरकारच्या दिव्यांग खात्याच्या सचिवपदाची जबाबदारी होती. आता त्यांच्यावर राज्याच्या मुख्य सचिवपदाची धुरा सोपविली जाणार आहे.
या आधी ३० जून २०२५ रोजी राजेशकुमार मीना यांची महाराष्ट्राच्या मुख्य सचिवपदी नियुक्ती करण्यात आली होती. त्यांची कारकीर्द आता ३० नोव्हेंबर रोजी संपणार आहे. त्यानंतर मुख्य सचिवपदाचा पदभार हा राजेश अगरवाल यांच्याकडे हस्तांतरित केला जाणार आहे.
राजेश अगरवाल यांना प्रशासनात दीर्घ अनुभव असून त्यांचे काम तितकेच प्रभावी ठरले आहे. अत्याधुनिक तंत्रज्ञान, वित्तीय सुधारणा आणि सामाजिक कल्याण योजनांमध्ये अगरवाल यांनी केलेली कामगिरी त्यांना देशातील प्रगतिशील प्रशासकांपैकी एक बनवते.
राजेश अगरवाल यांनी आयआयटी दिल्ली येथून बी.टेक पदवी प्राप्त केली. प्रशासकीय सेवेत प्रवेश केल्यानंतरही त्यांनी तंत्रज्ञानाचा वापर शासन व्यवस्थेत कसा प्रभावी ठरू शकतो, यावर सातत्याने काम केले. महाराष्ट्र कॅडरमध्ये नियुक्तीनंतर अगरवाल यांनी अनेक महत्त्वाच्या जबाबदा-या सांभाळल्या. अकोला आणि जळगावचे जिल्हाधिकारी म्हणून त्यांनी अनेक विकासकामांना गती दिली. मुंबई महानगरपालिकेत डेप्युटी कमिशनर पदावर असताना शहरी व्यवस्थापनाशी संबंधित विविध प्रकल्प राबवले. महाराष्ट्राच्या वित्त विभाग आणि माहिती तंत्रज्ञान विभागात त्यांनी धोरणात्मक निर्णय, आर्थिक शिस्त आणि डिजिटल प्रशासनाला बळ देण्यावर भर दिला.
