नवी दिल्ली : वृत्तसंस्था
भारत आणि रशिया सुपरसॉनिक क्रूज मिसाइलला हायपरसॉनिक बनवण्यासाठी एकत्र आले आहेत. भारत आणि रशियाचे एक्सपर्ट मिळून यावर काम करत आहेत. ब्रह्मोसलाच हायपरसोनिक बनवण्यासाठी दोन्ही देश एकत्र आले आहेत. अलीकडेच भारत-पाकिस्तान तणावादरम्यान भारताच्या या शस्त्राची जगाने ताकद पाहिली होती. १५ देश ब्रह्मोस मिसाइल विकत घेण्यामध्ये स्वारस्य दाखवत आहेत. ब्रह्मोसचे हायपरसॉनिक वर्जन आल्यानंतर ही ताकद अजून कित्येक पटीने वाढेल.
ब्रह्मोस एअरोस्पेसचे माजी महासंचालक अतुल राणेंनी या बद्दल खुलासा केला. ते म्हणाले की, ‘रशिया आणि भारत मिळून लवकरच ब्रह्मोसच्या क्रूज मिसाइलचे हायपरसॉनिक वर्जन बनवू शकतात’ मॉस्कोत झालेल्या या चर्चेबद्दल राणे म्हणाले की, ‘सध्या ब्रह्मोसचे अनेक वर्जन आहेत. दोन्ही देश यामध्ये सुधारणा करत आहेत.’
ब्रह्मोस क्रूज मिसाइल भारत आणि रशियाचा संयुक्त उपक्रम आहे. या मिसाइलचे नाव ब्रह्मपुत्र आणि मोस्कवा नदीच्या नावावरुन देण्यात आले आहे. डीआरडीओची यामध्ये ५०.५ टक्के भागीदारी आहे. रशियन एनपीओ मशीनोस्ट्रोयेनियाचा ४९.५ टक्के हिस्सा आहे. राणे यांच्यानुसार, भारत आणि रशिया दोन्ही देश सतत या मिसाइलच्या टेक्नोलॉजीवर काम करत आहेत. मिसाइलचा वेग आवाजाच्या गतीपेक्षा कमीत कमी पाचपट जास्त असेल ते मिसाइल हायपरसॉनिक असते. त्याचा कमीत कमी स्पीड ६१७४ किमी प्रतीतास असतो. खूप कमी वेळात हे मिसाइल आपल्या टार्गेटपर्यंत पोहोचते. उड्डाणादरम्यान हे मिसाइल आपली दिशा सुद्धा बदलू शकते. प्रचंड वेग असल्यामुळे या मिसाइलला अँटी मिसाइल सिस्टिम आणि रडार इंटरसेप्ट करु शकत नाही.
