– हिंदी महासागरात चौथे चिनी हेरगिरी जहाज दाखल
नवी दिल्ली : वृत्तसंस्था
भारताच्या राष्ट्रीय सुरक्षेच्या दृष्टीने एक चिंताजनक बातमी समोर आली असून भारताने केलेल्या क्षेपणास्त्र चाचणीपूर्वी दिलेल्या नोटाम इशा-याच्या पार्श्वभूमीवर चौथे चिनी हेरगिरी जहाज हिंदी महासागरात दाखल झाले आहे.
या चीनी जहाजाच्या हालचालींवर भारतीय नौदल आणि सुरक्षा यंत्रणा बारकाईने लक्ष ठेवून आहेत. भारताच्या संरक्षण क्षमतेची माहिती गोळा करण्याच्या चीनच्या प्रयत्नांचा हा एक भाग मानला जात आहे. अलीकडच्या काळात चीनची ही जहाजे वारंवार हिंदी महासागरात गस्त घालत आहेत. संशोधनाच्या नावाखाली ते हेरगिरी करत आहेत. भारताच्या महत्त्वाकांक्षी क्षेपणास्त्र चाचणीपूर्वी हे चिनी जहाज या क्षेत्रात दाखल झाले आहे.
जेव्हा भारत क्षेपणास्त्र चाचणी करतो, तेव्हा समुद्रातील जहाजांसाठी आणि विमानांसाठी धोक्याचा इशारा म्हणून नोटाम जारी केला जातो. या काळात चीन अशी जहाजे पाठवून भारताच्या क्षेपणास्त्र प्रक्षेपणाचे टेलीमेट्री डेटा आणि इतर महत्त्वाच्या संरक्षण प्रणालीची गुप्तचर माहिती गोळा करण्याचा प्रयत्न करतो. या क्षेत्रात भारताच्या सुरक्षेला आव्हान देण्यासाठी चीन वारंवार असे पाऊल उचलत आहे.
भारताच्या चाचण्यांवर
चीनची बारीक नजर
चीनने अशा प्रकारे हेरगिरी जहाजे पाठवण्याचा प्रयत्न करण्याची ही पहिलीच वेळ नाही. यापूर्वीही भारताच्या महत्त्वाच्या चाचण्यांच्या वेळी अशी जहाजे हिंदी महासागरात आढळली आहेत, ज्यामुळे भारत-चीन संबंधांमधील तणाव अधिक वाढला आहे.
