जळकोट : प्रतिनिधी
जळकोट तालुक्यात मोठ्या प्रमाणात वन्यजीव प्राण्याकडून शेतक-यांच्या पिकाची नासाडी होत असल्याचे निदर्शनास येत आहे. तालुक्यामध्ये मोठ्या प्रमाणात हरीण तसेच रानडुकरांची संख्या वाढली आहे. या वन्य प्राण्याकडून मोठ्या प्रमाणात शेतीतील पिकांची नासाडी केली जात आहे यामुळे शेतक-यांना मोठा आर्थिक फटका सहन करावा लागत आहे.
जळकोट तालुक्यातील होकर्णा येथील महिला शेतकरी अनिता श्रीधर पाटील यांची गट क्रमांक १०८ मध्ये शेती आहे. या शेतीमध्ये त्यांनी पावसाळ्यात तूर या पिकाची लागवड केली होती. सध्या तुरीला चांगला बहारही आला होता. त्यामुळे यावर्षी चांगले उत्पादन होईल अशी अपेक्षा होती . मात्र दोन ते तीन दिवसांपूर्वी त्यांच्या शेतामधील सर्व तुरीचे पीक हरीण तसेच रानडुक्कर यासारख्या वन्यप्राण्यांनी खाऊन टाकले तसेच पिकांची नासाडी केली. प्रशासनाने पंचनामा करून सदरील शेतक-यास मदत द्यावी अशी मागणी होत आहे.
