क्वेटा : पाकिस्तानच्या बलुचिस्तान प्रांतात एक अत्यंत भीषण आणि धक्कादायक घटना समोर आली आहे. क्वेटा येथील चमन गेटजवळ एका ट्रेनला लक्ष्य करून आत्मघाती हल्ला करण्यात आला आहे. रेल्वे रुळाजवळ झालेल्या या शक्तिशाली स्फोटात किमान २३ लोकांचा दुर्दैवी मृत्यू झाला असून, अन्य ४७ जण गंभीर जखमी झाले आहेत.
मिळालेल्या प्राथमिक माहितीनुसार, हा स्फोट इतका भीषण होता की त्यामुळे संपूर्ण परिसरात प्रचंड खळबळ उडाली आणि नागरिकांमध्ये घबराटीचे वातावरण निर्माण झाले. स्फोटानंतर घटनास्थळी मोठा गोंधळ उडालेला पाहायला मिळाला. या घटनेची माहिती मिळताच स्थानिक पोलीस प्रशासन आणि मदत पथकांनी तात्काळ धाव घेतली. जखमींना तातडीने जवळच्या रुग्णालयात उपचारासाठी दाखल करण्यात आले असून, मृतांचा आकडा आणखी वाढण्याची भीती व्यक्त केली जात आहे.
आत्मघाती हल्ला
सुरक्षा यंत्रणांनी खबरदारीचा उपाय म्हणून सध्या हा संपूर्ण परिसर पूर्णपणे सील केला आहे. हा आत्मघाती हल्ला नेमका कोणी आणि कोणत्या हेतूने केला, याचा शोध घेण्यासाठी सुरक्षा दलांकडून कसून तपास सुरू करण्यात आला आहे. अद्याप कोणत्याही संघटनेने या हल्ल्याची अधिकृत जबाबदारी घेतलेली नाही.
