जालना : एका चौथी नापास माणसाने उपोषणाचे नाटक करत बेकायदेशीर मागण्या केल्या आणि सरकारने त्याच्या दबावाखाली येत ओबीसींचे आरक्षण संपुष्टात आणले आहे. सरकार चौथी पास माणसाच्या मागण्यांवर लगेच जीआर काढते, हे राज्याचे मोठे दुर्दैव आहे अशा अत्यंत कडक शब्दांत लक्ष्मण हाके यांनी हल्लाबोल केला आहे.
लक्ष्मण हाके म्हणाले की गेल्या दोन-तीन वर्षांत सरकारने घेतलेल्या निर्णयामुळे आणि मनोज जरांगेंच्या आंदोलनामुळे ओबीसींचे आरक्षण संपुष्टात आले आहे. आम्ही हे पुराव्यानिशी सिद्ध करायला तयार आहोत. शासनाने नुकतेच सुरू केलेले प्रमाणपत्र वाटपाचे शिबिर म्हणजे खिरापत वाटण्याचा प्रकार आहे. महाराष्ट्राच्या इतिहासात असे कधीच घडले नव्हते. आम्हाला फक्त मुख्यमंर्त्यांची भेट नकोय, तर मराठा आणि ओबीसी उपसमितीच्या मंर्त्यांच्या उपस्थितीत आमचे आरक्षण कसे संपले, हे आम्ही त्यांना समजावून सांगू. महसूलमंत्री राधाकृष्ण विखे पाटील, प्रसाद लाड आणि उदय सामंत यांनीही यावेळी उपस्थित राहावे, अशी मागणी त्यांनी केली.
जरांगे यांच्याकडून मंत्र्यांना आणि नेत्यांना दिल्या जाणा-या शिव्यांवरून हाकेंनी तीव्र संताप व्यक्त केला. जो माणूस लोकशाही मानत नाही, शिष्टमंडळाचा आदर करत नाही आणि मुख्यमंत्र्यांचाही मान ठेवत नाही, त्याच्याकडून काय अपेक्षा ठेवणार? जरांगे शिवीगाळ करत असताना, राधाकृष्ण विखे पाटलांसारख्या मोठ्या नेत्यांच्या घराण्याची अब्रू चव्हाट्यावर आणली जात असताना, हे सरकार मूग गिळून का गप्प बसले होते? असा सवाल त्यांनी उपस्थित केला. जरांगे यांच्या आंदोलनात लाठीचार्ज झाला, पोलिसांवर हल्ले झाले आणि ओबीसींची घरे जाळण्यात आली. त्यावेळच्या एसआयटी चौकशीचे काय झाले? या आंदोलनाची सखोल चौकशी झाली पाहिजे अशी मागणी हाके यांनी केली.
