नवा शहर : पहलगाममधील दहशतवादी हल्ल्यानंतर, पोलिसांनी पंजाबमधील शहीद भगतसिंग नगर (नवा शहर) च्या जंगलातून २ आरपीजी, २ आयईडी, ५ हँडग्रेनेड आणि एक वायरलेस कम्युनिकेशन सेट जप्त केला. गुप्तचर माहितीनंतर, अमृतसरचे राज्य विशेष ऑपरेशन्स सेल (एसएसओसी) केंद्रीय एजन्सीसह कारवाई करीत आहे.
पंजाबचे डीजीपी गौरव यादव यांनी याची पुष्टी केली आहे. त्यांनी सोशल मीडिया प्लॅटफॉर्म वर लिहिले- सुरुवातीच्या तपासात असे दिसून आले आहे की पाकिस्तानच्या आयएसआय आणि त्यांच्याशी संबंधित दहशतवादी संघटनांनी पंजाबमध्ये लपलेले त्यांचे स्लीपर सेल पुन्हा सक्रिय करण्याची योजना आखली होती. स्फोटक पदार्थांची जप्ती हा या कटाचा एक भाग आहे. दहशतवाद्यांनी भविष्यातील दहशतवादी घटनांसाठी हे साहित्य लपवून ठेवले होते. याप्रकरणी अमृतसर एसएसओसी टीमने गुन्हा दाखल केला आहे. आरोपीला लवकरच अटक केली जाईल.
गुरदासपूरमध्ये पाकिस्तानी घुसखोर पकडला सोमवारी बीएसएफने गुरुदासपूरमधील भारत-पाकिस्तान आंतरराष्ट्रीय सीमेवर एका पाकिस्तानी नागरिकाला अटक केली. त्याच्याकडे एक पाकिस्तानी ओळखपत्रही सापडले. ही अटक गुरुदासपूरमधील ठाकूरपूर येथे झाली. त्या तरुणाचे नाव आय-कार्डवर हुसेनैन असे लिहिले आहे. तो पाकिस्तानातील गुजरांवाला येथील रहिवासी आहे. सुरुवातीच्या चौकशीत त्याने सांगितले की तो नकळत भारतीय सीमेत घुसला होता. बीएसएफला त्याच्याकडून कोणतीही आक्षेपार्ह वस्तू सापडली नाही.
बीएसएफने अटक केलेल्या व्यक्तीला पंजाब पोलिसांच्या स्वाधीन केले आहे. पोलिस अधिक तपास करत आहेत. अधिका-यांचे म्हणणे आहे की या प्रकरणाची प्रत्येक कोनातून चौकशी केली जात आहे जेणेकरून कोणत्याही संभाव्य कटाची किंवा सुरक्षेतील त्रुटीची गांभीर्याने चौकशी करता येईल.
२ दिवसांपूर्वीच पाक हेरांना पकडले
अमृतसरमध्ये २ पाकिस्तानी हेरांना अटक अमृतसर पोलिसांनी २ दिवसांपूर्वी दोन संशयित हेरांना अटक केली होती. ते भारताची संवेदनशील लष्करी आणि सामरिक माहिती पाकिस्तानच्या गुप्तचर संस्थेला आयएसआयकडे पाठवत होते. दोघांनीही सीमावर्ती भागात लष्करी कारवायांचे फोटो, व्हीडीओ आणि लोकेशन डेटा व्हॉट्सअॅप आणि इतर माध्यमातून पाकिस्तानला पाठवला होता. हे दोघेही अमृतसर तुरुंगात असलेल्या हरप्रीत सिंग उर्फ पिट्टू उर्फ हॅपी मार्फत आयएसआयशी जोडले गेले होते.
पलक शेर मसिह आणि सूरज मसिह अशी आरोपींची नावे आहेत. त्यांच्याकडून मोबाईल, सिम कार्ड, रोख रक्कम आणि संशयास्पद कागदपत्रेही जप्त करण्यात आली आहेत. दोघांनाही आमिष दाखवून भरती केल्याचे तपासात उघड झाले. त्याला एका फोटोसाठी ५ ते १० हजार रुपये मिळायचे.
