फरीदाबाद : हरियाणातील फरिदाबाद कारागृहात बंद असलेला दहशतवादी अब्दुल रहमान याची हत्या करण्यात आली आहे. रविवारी रात्री उशिरा कारागृहात खून प्रकरणात बंद असलेल्या अरुण चौधरी उर्फ अब्बू जट नावाच्या कैद्याने त्याच्यावर धारदार वस्तूने हल्ला केला. दोघांनाही उच्च सुरक्षा असलेल्या बराकमध्ये एकत्र ठेवण्यात आले होते.
हत्येची माहिती मिळताच कारागृह अधिकारी बराकमध्ये पोहोचले. त्यानंतर दहशतवाद्याचा मृतदेह शवविच्छेदनासाठी पाठवण्यात आला. २० वर्षीय दहशतवादी अब्दुलला गुजरात एटीएसने मार्च २०२५ मध्ये पकडले होते. तपासात तो अलकायदा इन इंडियन सब-काँटिनेंट(एक्यूआयएस)चा कुख्यात दहशतवादी अबू सुफियान याच्या संपर्कात असल्याचे समोर आले. त्याने अयोध्येतील राम मंदिर उडवण्याचा कट रचला होता. तर, खून करणारा कैदी अरुण चौधरी याचे नावही चर्चित अक्षय शर्मा हत्याकांडात आले होते. त्याला पंजाबमध्ये झालेल्या चकमकीनंतर अटक करण्यात आली होती. त्यानंतर २ वर्षांपूर्वीच त्याला कठुआ कारागृहातून फरिदाबादच्या या नीमका कारागृहात हलवण्यात आले होते.
