मुंबई : राज्यातील २९ महानगरपालिकेसाठी १५ जानेवारीला मतदान होणार असून त्यासाठी उमेदवारी अर्ज दाखल करण्यासाठी ३० डिसेंबर दुपारी ३ वाजेपर्यंत मुदत आहे. त्यातच आता उमेदवारी अर्ज दाखल करण्यासाठी केवळ ४८ तासांचा अवधी शिल्लक राहिला आहे. मात्र, राज्यात महायुती आणि महाविकास आघाडीमध्ये जागा वाटपावरून घोडे अडलेलच आहे. महायुतीमध्ये भाजप व एकनाथ शिंदे यांच्या शिवसेनेची बोलणी सुरु आहे. तर दुसरीकडे अजित पवार यांची राष्ट्रवादी काँग्रेस वेगळी निवडणूक लढवत आहे. तर महाविकास आघाडीत काँग्रेस, ठाकरे सेना, मनसे आणि राष्ट्रवादी काँग्रेसमध्ये अद्यापही एकमत न झाल्याने कुठे महायुतीत तर कुठे महाविकास आघाडीत फाटाफूट झाल्याचे पाहावयास मिळाले आहे.
सध्या तरी मुंबई महापालिकेत भाजप, शिवसेनेचे जवळपास ठरले आहे. काही जागांवर अद्याप बोलणी सुरु आहे. तर पुणे, ठाणे आणि वसई-विरारमध्ये दोन्ही पक्षांची बोलणी अंतिम टप्प्यात आली आहे. तर नाशिक, छत्रपती संभाजीनगर, मीरा भाईंदरमध्ये चर्चा थांबली आहे तर अमरावती, सोलापूरमध्ये महायुती फिस्कटली आहे. तर काही महापालिकेत अजूनही चर्चेचे गु-हाळ सुरूच आहे.
सोलापूर, अमरावतीत महायुतीत फूट
सोलापूर महापालिकेत दोन्ही पक्षामधील महायुती तुटली आहे. त्याठिकाणी एकनाथ शिंदेंची शिवसेना व अजित पवार यांच्या राष्ट्रवादी काँग्रेसची युती झाली असल्याची घोषणा माजी मंत्री व शिवसेनेचे नेते सिद्धाराम म्हेत्रे यांनी केली आहे. दोघांनाही ४५-४५ सामान जागा वाटून घेतल्या आहेत. तर अमरावतीत भाजप ४५ ते ५० जागांवर लढण्याच्या तयारीत असताना, शिंदे गट आणि राणांच्या ‘युवा स्वाभिमान’ पक्षाला किती जागा द्यायच्या, यावरून महायुती फिस्कटली आहे.
मुंबईत शरद पवारांची ठाकरे बंधूंना साथ
मुंबई महापालिका निवडणूकीसाठी राष्ट्रवादी काँग्रेस शरदचंद्र पक्षाने ठाकरे बंधुंबरोबर युती केली आहे. राष्ट्रवादी शरदचंद्र पवार पक्षाला उबाठा मनसे यूतीकडून १० जागा देण्यात आल्या आहेत. राष्ट्रवादी काँग्रेस शरदचंद्र पवार पक्षाचा ५२ जागांच्या मागणीचा प्रवास अखेर १० जागांवर येऊन संपला आहे. यामुळे आता मुंबई महानगरपालिकेच्या निवडणुकीत ठाकरे बंधूबरोबर राष्ट्रवादी काँग्रेस शरदचंद्र पवार पक्ष देखील सहभागी असणार आहे.
आघाडीच्या बैठकीला शरद पवार गटाची दांडी
पुण्यात आज महाविकास आघाडीच्या नेत्यांकडून जागावाटपासाठी बैठकीचे आयोजन करण्यात आले होते. मात्र राष्ट्रवादी शरद पवार गटाकडून या बैठकीकडे पाठ फिरवण्यात आली आहे. त्यामुळे ठाकरे गट आणि काँग्रेसच्या नेत्यांमध्ये बैठक पार पडली. यावेळी या नेत्यांनी शरद पवारांची राष्ट्रवादी चर्चेसाठी न आल्याची तक्रार वरिष्ठांकडे केली. यावर संजय राऊत यांनी कोणाची वाट पाहू नका पुढे जा अशी सूचना केल्याची माहिती समोर आली आहे.
काँग्रेस-ठाकरे गट ताकदीने लढू : काँग्रेस
आज सकाळपासून आम्ही निवडणुकीच्या बैठकीसाठी बसलो आहोत. राष्ट्रवादी काँग्रेसच्या नेत्यांना देखील निरोप दिले होते. ते दुपारी येणार होते पण अजून त्यांचे नेते आले नाहीत. तरीही काल ज्या जागा त्यांना ठेवल्या आहेत त्या आजही तशाच आहेत. १६५ जागांची आमची यादी तयार आहे. मी त्यांच्या सगळ्या नेत्यांना कॉल केला त्यांचे नेते फोन उचलत नाही आहे. कुणी आलं कुणी नाही आलं तरी आमची तयारी आहे. काँग्रेस आणि ठाकरे गट पुण्यात ताकदीने लढू.
महायुती
मुंबईत
– भाजप-शिंदेसेनेचे
१५० जागांवर एकमत
– नवाब मलिकांमुळे राष्ट्रवादी (अजित पवार)ला दणका
ठाणे
– भाजप-शिवसेना एकत्र राष्ट्रवादी स्वबळावर
नवी मुंबई
– गणेश नाईकांमुळे भाजप-शिवसेना युतीबाबत संभ्रम
पुणे
– दोन्ही राष्ट्रवादीच्या एकत्रीकरणावरून संभ्रम
– भाजपचा १२५ जागांचा दावा
नागपूर
– स्थानिक पातळीवर अद्यापही चर्चा सुरू
महाआघाडी
मुंबईत
– ठाकरे बंधुंची आघाडी निश्चित
– शरद पवारांची अनिश्चिती
– काँग्रेसची स्वबळाची तयारी
ठाणे
– ठाकरे बंधू एकत्र लढणार
नवी मुंबई
– मविआ-मनसेमध्ये प्राथमिक चर्चा
पुणे
– शरद पवार आणि काँग्रेसकडून मुलाखती सुरू
– ठाकरे-शिवसेना वेगवेगळी लढणार?
नागपूर
– पवार आणि ठाकरे सेनेपेक्षा काँगे्रस वरचढ
