नांदेड : प्रतिनिधी
जिल्ह्यातील मालमत्तेविरुद्ध व शरीराविरुद्ध होणा-या गुन्ह्यांना आळा घालण्यासह सराईत गुन्हेगारांवर प्रभावी नियंत्रण ठेवण्यासाठी पोलिसांनी ११ ते १२ ऑगस्ट रोजी पहाटे ३ वाजेपर्यंत संपूर्ण जिल्ह्यात विशेष कोंबिंग ऑपरेशन राबविले. पोलीस अधीक्षक डॉ. नीलाभ रोहन यांच्या आदेशानुसार झालेल्या या मोहिमेत ५५ अधिकारी आणि २१८ अंमलदार, तसेच आरसीपी पथक सहभागी झाले होते. या कारवाईत तडीपार, प्रस्तावित तडीपार, एमपीडीएतून सुटलेले गुन्हेगार, सराईत गुन्हेगार, हिस्ट्रीशीटर तसेच पाहिजे व फरारी आरोपींची सखोल तपासणी करण्यात आली.
कोंबिंग ऑपरेशनदरम्यान ५५, ५६, ५७ मधील तडीपार व प्रस्तावित गुन्हेगार ३०, एमपीडीएतून सुटलेले ३३ आणि मालमत्ता व शरीराविरुद्धचे सराईत गुन्हेगार ८८, अशा एकूण १५१ गुन्हेगारी प्रवृत्तीच्या व्यक्तींची तपासणी करण्यात आली. याशिवाय अवैध शस्त्र बाळगणा-यांवरही कारवाई करण्यात आली. आर्म्स अॅक्टनुसार ४ गुन्हे आणि महाराष्ट्र पोलीस कायदा कलम १२२ नुसार २ गुन्हे दाखल करण्यात आले. न्यायालयीन कारवाईअंतर्गत २९ बीडब्ल्यू व ५ एनबीडब्ल्यू वॉरंट बजावण्यात आले, तर ५५ समन्सची बजावणी करण्यात आली.या विशेष मोहिमेत दाखल झालेल्या सहा गुन्ह्यांमध्ये वजीराबाद, इतवारा, विमानतळ तसेच वजीराबाद, भाग्यनगर येथे २ अशाप्रकारे ६ आरोपींचा समावेश आहे.पोलीस अधीक्षक डॉ. नीलाभ रोहन यांच्या मार्गदर्शनाखाली अपर पोलीस अधीक्षक गुरव , सर्व उपविभागीय पोलीस अधिकारी, सर्व पोलीस ठाणे प्रभारी अधिकारी व दुय्यम अधिकारी, स्थानिक गुन्हे शाखेचे अधिकारी व अंमलदार तसेच आरसीपी पथकाने या मोहिमेत सक्रिय सहभाग घेतला.
