अमरावती : आंध्र प्रदेशातील वायएसआर कडप्पा जिल्ह्यात गेल्या काही आठवड्यांत कोरोनाचे आठ रुग्ण आढळले असून दोन जणांचा मृत्यू झाला आहे. नवीन रुग्ण आणि मृत्यूंच्या पार्श्वभूमीवर, आरोग्य अधिका-यांनी तपासणी वाढवली आहे.
मिळालेल्या माहितीनुसार, कडप्पा येथील राजमपेट भागातील एका ५२ वर्षीय व्यक्तीला ताप आणि खोकल्याचा त्रास जाणवत होता. त्याची कोविड-१९ चाचणी पॉझिटिव्ह आली आणि वेल्लोर येथील ख्रिश्चन मेडिकल कॉलेजमध्ये उपचारादरम्यान त्याचा मृत्यू झाला. दुस-या एका प्रकरणात कडपा येथील ४३ वर्षीय व्यक्तीची प्रकृती खालावल्यानंतर त्याला सरकारी रुग्णालयात दाखल करण्यात आले. त्याची कोविड-१९ चाचणी पॉझिटिव्ह आली आणि नंतर उपचारादरम्यान त्याचा मृत्यू झाला.
कडप्पा वैद्यकीय महाविद्यालयातील एका २५ वर्षीय वैद्यकीय विद्यार्थ्यालाही विषाणूची लागण झाली असून, तो सध्या गृह विलगीकरणात उपचार घेत आहे. या दोन मृत्यूंमुळे परिसरात घबराट पसरली. आरोग्य विभागाने तातडीने कारवाई करत जिल्ह्यात विशेष जलद प्रतिसाद पथके तैनात केली. या पथकाने बाधित भागातील सुमारे ४० लोकांकडून नमुने गोळा केले. अहवालानुसार, १८ नमुने निगेटिव्ह आले असून, उर्वरित नमुन्यांच्या अहवालाची प्रतीक्षा आहे. मंत्र्यांनी जिल्हाधिकारी आणि मुख्यमंत्री कार्यालयाशी फोनवर संवाद साधला आणि त्यांना कोविड-१९ च्या मार्गदर्शक तत्त्वांची काटेकोरपणे अंमलबजावणी करण्याचे निर्देश दिले.
ताप, खोकला आणि श्वास घेण्यास त्रास होणे यांसारखी लक्षणे असलेल्या लोकांना ओळखून, आवश्यकतेनुसार त्यांना विलगीकरण केंद्रांमध्ये हलवण्याचे आदेशही त्यांनी अधिका-यांना दिले. बाधित भागांमध्ये स्वच्छतेचे उपाय अधिक तीव्र करण्यात आले असून, स्वच्छता आणि निर्जंतुकीकरणाची कामे सुरू आहेत.
रुग्णांवर उपचार सुरू
जिल्हा आरोग्य अधिका-यांनी जिल्हा परिषदेच्या बैठकीत माहिती दिली की, जिल्ह्यात सध्या कोविड-१९ चे आठ सक्रिय रुग्ण आहेत. विषाणूचा प्रकार ओळखण्यासाठी आणि त्याच्या प्रसाराची पद्धत समजून घेण्यासाठी हे नमुने जीनोम सिक्वेन्सिंगकरिता पुण्यातील प्रयोगशाळेत पाठवण्यात आले आहेत. आंध्र प्रदेशच्या जिल्हा प्रभारी मंत्री सविता यांनी कडपामध्ये संसर्गाचा पुढील प्रसार रोखण्यासाठी तातडीने उपाययोजना करण्याचे निर्देश अधिका-यांना दिले आहेत.
