24.3 C
Latur
Thursday, June 24, 2021
Homeसंपादकीयदादागिरी नही चलेगी!

दादागिरी नही चलेगी!

एकमत ऑनलाईन

मोदी सरकारने संख्याबळाच्या जोरावर आणि विरोधकांच्या विस्कळीतपणाचा योग्य वापर करीत कृषी सुधारणासंबंधीची तीन विधेयके संसदेच्या दोन्ही सभागृहांत मंजूर करून घेतली असली तरी विधेयके मंजूर होण्याच्या घटनाक्रमाने जी ठिणगी पडली आहे ती पाहता मोदी सरकारला या यशाचा आनंद साजरा करता येणे अवघडच बनले आहे. एकीकडे ज्या शेतक-यांच्या हितासाठी व उद्धारासाठी ही विधेयके आणल्याचा दावा सरकार करते आहे त्याच शेतक-यांना सरकारच्या हेतूबद्दल व ‘कथनी व करणी’ बाबतच शंका असल्याने ते रस्त्यावर उतरले आहेत. या शेतक-यांचा विश्वास प्राप्त करण्यात सरकारला अपयश आले आहे.

सरकार भलेही विरोधकांवर गैरसमज पसरविल्याचा आरोप करीत असले तरी गैरसमज निर्माण झाल्याची ती अप्रत्यक्ष कबुलीच आहे तर दुसरीकडे सरकार विरोधकांना या घटनाक्रमाने ‘आयते कोलित’च मिळाले आहे. सरकारकडे सध्या मोठे संख्याबळ असल्याने कदाचित केंद्रात मोदी सरकार त्याची फारशी चिंताही करणार नाही. मात्र, ज्या राज्यांमध्ये विधानसभा निवडणुका होऊ घातल्या आहेत तेथे भाजपसाठी कृषी विधेयके ‘अंगलट’ येण्याचीच स्थिती आहे. तेथे भाजपची स्थिती ‘करायला गेलो एक आणि झाले भलतेच’ अशीच होण्याची चिन्हे दिसतायत. कदाचित निवडणूक मॅनेजमेंटमध्ये मास्टरी प्राप्त असलेली मोदी-शहा अजेय जोडी त्यावर उतारा शोधून काढेलही मात्र, तिसरीकडे जो राजकीय घटनाक्रम घडलाय तो भाजपच्या नेतृत्वाखालील राष्ट्रीय लोकशाही आघाडीसाठी जास्त चिंतेचा व या आघाडीचा मजबूत पाया खिळखिळा होण्यास कारणीभूत ठरणारा असू शकतो व तो म्हणजे भाजपचा सर्वांत जुना व कायमचा मित्र असलेल्या शिरोमणी अकाली दलाने उघडपणे व्यक्त केलेली नाराजी.

कृषी विधेयकांवर रालोआमध्ये एकमत होऊन ते संसदेत आणले गेले नाही. यावर आता या पक्षाच्या सरकारमध्ये असलेल्या एकमेव मंत्री हरसिमरत कौर यांनी आपल्या पदाचा राजीनामा दिल्याने शिक्कामोर्तब झाले आहे. शिरोमणी अकाली दलाने अद्याप रालोआतून बाहेर पडण्याची अधिकृत घोषणा केलेली नसली तरी पंजाबातील शेतक-यांचा वाढता संताप व उद्रेक पाहता शिरोमणी अकाली दल आपल्या मतदारांसोबत जाणार हे सांगण्यासाठी कुठल्याही भविष्यकाराची गरज नाहीच! त्यामुळे या घोषणेच्या औपचारिक पूर्ततेचे ‘टायमिंग’ काय? हाच काय तो उत्सुकतेचा मुद्दा! भाजपसाठी हा दुसरा मोठा धक्का ठरणार आहे. कारण ज्या वेळी भारतीय राजकारणात हिंदुत्ववादी भाजप इतर सर्व राजकीय पक्षांसाठी राजकीयदृष्ट्या ‘अस्पृश्य’ होता त्या वेळी या पक्षासोबत दोन मित्रपक्ष अत्यंत ठामपणे उभे होते ते म्हणजे बाळासाहेब ठाकरे यांची शिवसेना व प्रकाशसिंग बादल यांचा शिरोमणी अकाली दल! या मित्रांच्या साथीनेच भाजपने आपला प्रवास सुरू ठेवत स्वत:चा परीघ वाढविला आणि सत्तेचा सोपान गाठला.

भिवंडीतील मृतांचा आकडा २५ वर

मात्र, सत्ता..प्राप्तीनंतर मोदी-शहांच्या प्रभावाखाली असलेल्या सध्याच्या भाजपला ‘ग’ची बाधा झाली आहे. त्यातून आपल्या सख्ख्या मित्रांचेही पंख छाटण्याचा उद्योग या जोडीने बिनदिक्कतपणे चालविला आहे. विशेष म्हणजे पक्षांतर्गत आव्हाने संपुष्टात आणून या जोडीने पक्षावर आपले पूर्ण वर्चस्व निर्माण केलेले असल्याने त्यांच्या वर्तनाला भाजपात चाप लावणारे कुणीही शिल्लकच नाही. त्यामुळे या जोडीचा वारू चौखूर उधळला आहे. त्यात दुस-या टर्ममध्ये पक्षाला स्वबळावर बहुमत प्राप्त झाल्याने ही अजेय जोडी केवळ विरोधकांनाच नव्हे तर आपल्यासोबत आघाडीत असलेल्या मित्रांनाही कस्पटासमान वागणूक देते आहे. भाजपच्या या वाढत्या दादागिरीचा पहिला फटका शिवसेनेला बसला. पहिल्या टर्ममध्ये भाजपने केंद्रात व राज्यातही शिवसेनेला अक्षरश: आपल्यामागे फरफटत नेले. महाराष्ट्रात शिवसेनेने सर्वप्रथम भाजपची दादागिरी सोसण्यास नकार देत वेगळी वाट धरली आणि भाजपला जोरदार धक्का दिला. मात्र, तरीही भाजपची ही अजेय जोडी भानावर आलेलीच नाही.

पंजाबमध्ये भाजप शिरोमणी अकाली दलाच्या ताकदीवरच जिवंत आहे. मग आपल्या मित्राला अडचणीचे ठरणारे निर्णय रेटून नेण्याची दादागिरी का? हाच अकाली दलाच्या असंतोषाचा मुद्दा आहे. योग्य समन्वय, संवाद व चर्चा या विश्वास संपादन करण्याच्या मार्गाने भाजपला या तिढ्यावर मार्ग नक्कीच काढता आला असता. मात्र, ‘ग’ ची बाधा झालेल्या अजेय-जोडीला याची गरजच वाटत नाही. ‘हम करे सो कायदा’ हीच भाजपची सध्याची कार्यपद्धती व प्रवृत्ती! यामुळे भाजप विरोधकांशी तर संवाद साधण्याचा विचारही करीत नाहीच मात्र, मित्रांना, सत्तेत भागीदार असणा-यांनाही विश्वासात घेण्याची गरज भाजपला वाटत नाही. त्यातूनच रालोआत असंतोषाची ठिणगी पडलीय! आधी चंद्राबाबू, मग उद्धव ठाकरे आणि आता बादल यांनी पुकारलेले बंड हा अजेय जोडीला झालेल्या ‘ग’च्या बाधेचा व त्यातून निर्माण झालेल्या दादागिरीच्या कार्यपद्धतीचा परिपाक! अर्थात हरसिमरत कौर यांच्या राजीनाम्याने किंवा उद्या अकाली दलाने रालोआतून बाहेर पडण्याची औपचारिक घोषणा केल्याने मोदी सरकारच्या स्थैर्यावर काहीही परिणाम होणार नाही, हे सत्यच!

जड झाले ‘ओझे’…

मात्र रालोआच्या भक्कम पायाला तडे नक्कीच गेले आहेत. दोन जुन्या मित्रांनी भाजपच्या अजेय जोडीविरुद्ध ‘दादागिरी नही चलेगी’चा नारा बुलंद केला आहे. त्याचा परिणाम आजवर मोदी वलयाच्या ओझ्याखाली दबून मुकाट हे ओझे गोड मानून घेणा-या इतर अनेक लहान-सहान पक्षांवर होणार व त्यांचा स्वाभिमान जागा होणार, हे नक्की! स्वत:चे वलय असणा-या नितीशकुमार, बिजू जनता दल या पक्षांनी तर या अगोदरच भाजपला केवळ धक्काच दिलेला नाही तर धडा शिकविला आहे. त्यामुळेच भाजपने बिहारमध्ये निमूटपणे नितीशकुमार यांचे नेतृत्व मान्य करीत पडती बाजू घेतली आहे. रामविलास पासवान त्यामुळे भाजपवर नाराज आहेत व त्यांचे पुत्र चिराग पासवान राज्यातील निवडणुकीत वेगळी वाट धरण्याच्या तयारीत आहेत. आघाडीच्या राजकारणात आपले बळ वाढले की, मित्रपक्षांना दुय्यम स्थानी लोटण्यास सुरुवात होते. हे राजकारणातील सत्य! २००९ मध्ये काँग्रेसला दोनशेपेक्षा जास्त जागांवर विजय मिळाल्यावरही हे घडले होतेच. मात्र, काँग्रेस नेतृत्वाने ‘ग’ची बाधा करून न घेतल्याने संपुआत धूसफूस झाली तरी विस्फोट झाला नव्हता! आता रालोआत मात्र भाजपच्या अजेय जोडीला ‘ग’ च्या बाधेने पुरते ग्रासल्याने मित्रपक्षांच्या असंतोषाचे भडके उडतायत व विस्फोट होतायत. त्यातूनच मुद्दा कुठलाही असला तरी ‘दादागिरी नही चलेगी’चा नारा बुलंद होतोय, हाच काय तो या घटनाक्रमाचा अन्वयार्थ!

ताज्या बातम्या

आणखीन बातम्या

1,527FansLike
202FollowersFollow
SubscribersSubscribe

लोकप्रिय बातम्या