मुंबई : अदानी समूहाच्या शेअर दरात सुरू असलेल्या घसरणीचे सत्र आजही कायम राहिले. जवळपास महिनाभरापासून अदानी समूहाच्या शेअर दरात घसरण सुरू आहे. मागील एक महिन्यात झालेल्या शेअर दरातील घसरणीमुळे अदानी आणि गुंतवणूकदारांना मोठा फटका बसला आहे. अदानी समूहातील एकूण कंपन्यांचे मार्केट कॅप ९८०० कोटी डॉलरची घसरले आहे. त्यामुळे गौतम अदानी यांच्या संपत्तीत घट झाली आहे. काही कंपन्यांच्या शेअर दरात लोअर सर्किट लागले आहेत.
ब्लूमबर्ग बिलेनियर इंडेक्सनुसार अदानी यांची संपत्ती ४३०० कोटी डॉलरपेक्षा कमी झाले आहे. गौतम अदानी आता जगातील सर्वाधिक श्रीमंतांच्या यादीत २९ व्या क्रमांकावर आहेत. अमेरिकन रिसर्च फर्म हिंडेनबर्गचा अहवाल आल्यानंतर अदानी समूहातील कंपन्यांचे एकत्रित मार्केट कॅप १३५०० कोटींहून अधिक घट झाली आहे. आता मार्केट कॅप ९८०० कोटी डॉलरपेक्षा कमी झाले आहे. २४ जानेवारी रोजी एकत्रित मार्केट कॅप २३२०० कोटी डॉलर इतके होते. आता मार्केट कॅप ९७०० कोटी डॉलरच्या आसपास आहे.
गौतम अदानींच्या संपत्तीत घट
या वर्षी गौतम अदानी यांच्या संपत्तीत आतापर्यंत जवळपास ७७९० कोटी डॉलर्सची घट झाली आहे. जगातील सर्वाधिक श्रीमंत व्यक्तींच्या यादीत अदानींची २९ व्या स्थानापर्यंत घसरण झाली आहे. सध्या त्यांची संपत्ती ४२७० दशलक्ष डॉलर्स इतकी झाली आहे. गेल्या वर्षी सप्टेंबरमध्ये १५००० कोटी डॉलर्सपेक्षा जास्त होती.
शेअर्स दरात ८३ टक्क्यांची घट
गुंतवणूकदारांकडून सुरू असलेल्या विक्रीच्या सपाट्यामुळे अदानी समूहातील कंपन्यांच्या शेअर दरात मोठी घसरण झाली आहे. अदानी ट्रान्समिशन लिमिटेड कंपनीचा शेअर आपल्या उच्चांकी शेअर दराच्या तुलनेत जवळपास ८० टक्क्यांनी घसरला आहे. अदानी टोटल गॅसचा शेअर दरही ८० टक्क्यांनी घसरला आहे. अदानी ग्रीन एनर्जीचा शेअर दर ८३ टक्क्यांनी अदानी पॉवरचा शेअर ६३ टक्क्यांनी, अदानी पोर्ट्स अ‍ॅण्ड एसईझेडचा शेअर ४४ टक्क्यांनी आपल्या उच्चांकापासून घसरला आहे.
अदानी विल्मरच्या शेअर दरातही घसरण
अदानी विल्मरच्या शेअर दरातही घसरण सुरू असून उच्चांकापासून ५७ टक्क्यांनी घसरला आहे. एनडीटीव्हीच्या शेअर दरात ६६ टक्क्यांची घसरण नोंदवण्यात आली आहे. एसीसी सिमेंट आणि अंबुजा सिमेंटच्या शेअर दरात उच्चांकी दरापासून ३८ ते ४२ टक्क्यांची घसरण नोंदवण्यात आली आहे.
