24.7 C
Latur
Thursday, July 7, 2022
Homeमहाराष्ट्रअ‍ॅड. जयश्री पाटीलही वॉन्टेड

अ‍ॅड. जयश्री पाटीलही वॉन्टेड

एकमत ऑनलाईन

पाटील यांनीच आंदोलन करण्यास सांगितल्याची धक्कादायक माहिती
मुंबई : राष्ट्रवादी काँग्रेसचे अध्यक्ष शरद पवार यांच्या घरावरील हल्ल्याप्रकरणी आता गुणरत्न सदावर्ते यांची पत्नी जयश्री पाटील यांनाही आरोपी करण्यात आले असून पोलिस दप्तरी त्यांना वॉन्टेड दाखवण्यात आले आहे. जयश्री पाटील यांनीच हे आंदोलन करण्यास सांगितले, अशी धक्कादायक बाब पोलिस तपासातून उघड झाली असून त्याआधारेच कारवाईचे पाऊल उचलण्यात आले आहे.

शरद पवार यांच्या घरावरील हल्ल्याप्रकरणी आधीच ऍड. गुणरत्न सदावर्ते यांना अटक करण्यात आली असून ते सध्या पोलिस कोठडीत आहेत. त्यांच्यानंतर आता त्यांची पत्नी ऍड. जयश्री पाटील यासुद्धा अडचणीत आल्या आहेत. पोलिसांनी आता त्यांच्याविरुद्धही गुन्हा दाखल केला आहे. शरद पवार यांच्या घरावर जे आंदोलन झाले ते जयश्री पाटील यांच्या सांगण्यावरून झाल्याची माहिती पोलिसांच्या हाती लागली आहे. ७ एप्रिल रोजी रात्री ११ ते पहाटे २:५० मिनिटे या कालावधीत गुणरत्न सदावर्ते, अभिषेक पाटील, जयश्री पाटील आणि कोअर कमिटीतील इतर लोकांची सदावर्ते राहत असलेल्या क्रीस्टील टॉवरच्या टेरेसवर मीटिंग झाली. याच मीटिंगमध्ये जयश्री पाटील यांनी पवारांच्या घरावर आंदोलन करण्यास सांगितले, असे पोलिस तपासात आढळून आले आहे.

दि. ८ एप्रिल रोजी आंदोलन झाले, त्यावेळी नागपूरची व्यक्ती मुंबईत होती. सर्व गोष्टी तोच हॅन्डल करत होता. त्या व्यक्तीनेच महालक्ष्मी रेल्वे स्टेशनवर उतरून गटागटाने सिल्व्हर ओक जवळील मैदानात जमा व्हा, असे मेसेज दिले. गार्डनमध्ये जमल्यावर अभिषेक पाटील यांनी कळविताच नागपूरच्या व्यक्तीने पत्रकारांना पाठविण्यास सांगितले, अशी धक्कादायक बाबही पोलीस तपासातून समोर आली आहे.

दरम्यान, शरद पवार यांच्या घरावर ८ एप्रिल रोजी एसटी कामगारांनी अचानक धडक दिली होती. हिंसक जमावाने गेटमधून आत घुसत दगडफेक आणि चप्पलफेक केली होती. त्यामुळे एकच खळबळ उडाली होती. खासदार सुप्रिया सुळे यांनी मोठ्या धाडसाने जमावाला सामोरे जात त्यांची समजूत काढली होती. पोलिसांनी वेळीच हस्तक्षेप करत आंदोलकांना ताब्यात घेतल्याने मोठा अनर्थ टळला होता. या प्रकरणी पोलिसांचा कसून तपास सुरू आहे.

एसटी कामगारांची बाजू कोर्टात मांडणारे वकील गुणरत्न सदावर्ते यांच्या अटकेनंतर अनेक महत्त्वाचे धागेदोरे पोलिसांच्या हाती लागले आहेत. त्यातून या प्रकरणाला वेगळेच वळण लागताना दिसत आहे.

Stay Connected

1,567FansLike
187FollowersFollow
SubscribersSubscribe

ताज्या बातम्या

आणखीन बातम्या

लोकप्रिय बातम्या