27 C
Latur
Saturday, August 13, 2022
Homeराष्ट्रीयगुरुवारी बहुमत चाचणी होणार

गुरुवारी बहुमत चाचणी होणार

एकमत ऑनलाईन

सर्वोच्च न्यायालयाचा आघाडी सरकारला धक्का
नवी दिल्ली : राज्यातील उद्धव ठाकरे यांच्या मार्गदर्शनाखाली काम करणारे महाविकास आघाडी सरकार जाणार की राहणार याचा फैसला उद्या होणार आहे. गुरुवारीच बहुमत चाचणी घेण्यात यावी, असा निकाल सर्वोच्च न्यायालयाने दिला आहे. राज्यपालांच्या आदेशावर आक्षेप घेऊन शिवसेनेने सर्वोच्च न्यायालयात एक याचिका दाखल केली होती. ती याचिका न्यायालयाने फेटाळली. पण उद्याचा निर्णय काहीही असो, तो ११ जुलैच्या निर्णयाला बांधिल असेल, असेही सर्वोच्च न्यायालयाने स्पष्ट केले आहे.

शिवसेनेने दाखल केलेल्या याचिकेवर तब्बल साडेतीन तास युक्तीवाद करण्यात आला. शिवसेनेच्या वतीने अभिषेक मनू सिंघवी यांनी युक्तीवाद केला तर एकनाथ शिंदे गटाच्या वतीने नीरज किशन कौल यांनी युक्तीवाद केला. त्यानंतर सर्वोच्च न्यायालयाने हा निकाल दिला.

सायंकाळी पाच वाजता सुप्रीम कोर्टात शिवसेनेच्या याचिकेवर सुनावणी सुरू झाली. अभिषेक मनु सिंघवी यांनी शिवसेनेच्या वतीने युक्तिवाद करताना जोपर्यंत उपाध्यक्षांचा निर्णय पूर्ण होत नाही, तोपर्यंत बहुमत चाचणी होऊ नये. कारण जर हे लोक अपात्र ठरले तर बहुमताचा आकडा बदलू शकतो, असे म्हटले. फ्लोअर टेस्टबद्दल सांगणा-या पत्रात म्हटले आहे की, २८ जून रोजी विरोधी पक्षनेत्यांनी राज्यपालांची भेट घेतली आणि आज सकाळी आम्हाला उद्या फ्लोअर टेस्टची माहिती मिळाली. वास्तविक, राष्ट्रवादीचे २ आमदार कोविडने त्रस्त आहेत, तर एक काँग्रेस आमदार परदेशात आहे. सभापतींच्या निर्णयापूर्वी मतदान होऊ नये. त्यांच्या निर्णयानंतर सभागृहाच्या सदस्य संख्येत बदल होणार आहे. समजा याचिका फेटाळली आणि स्पीकर अपात्र ठरले, तर उद्या फ्लोअर टेस्टचा निकाल कसा लावता येईल, ही एक अपरिवर्तनीय प्रक्रिया आहे. बंडखोर आमदारांना २१ जून रोजीच अपात्र ठरवण्यात आले आहे. न्यायालयाने ती (अपात्रता) प्रक्रिया थांबवली आहे. त्यामुळे अपात्रतेच्या कारवाईला स्थगिती देऊन मग ते आंदोलन करत आहेत. असे होऊ शकत नाही. बंडखोर लोकांना मतदान करू दिल्यास ते लोकशाहीची मुळे छाटतील, असे सिंघवी म्हणाले.

दुसरीकडे शिंदे गटाचे वकील नीरज किशन कौल यांनी युक्तिवाद करताना पीठासीन अधिका-याच्या अविश्वासाचा निर्णय होत नाही, तोपर्यंत त्यांना निर्णय घेता येत नाही, असे म्हटले. अध्यक्ष पदावर राहतील की नाही, याचा निर्णय होणे गरजेचे असल्याचे कौल म्हणाले. कोर्टाने स्थगिती देण्याचा प्रश्न नाही, तुमच्या योग्यतेवर प्रश्नचिन्ह असल्याने तुम्ही या प्रकरणाला सामोरे जाऊ शकत नाही, असा प्रश्न आहे. खुद्द अध्यक्षांच्या विरोधात अविश्वास प्रस्ताव असताना ते आमदारांच्या अपात्रतेची सुनावणी करू शकत नाहीत. फ्लोअर टेस्ट पुढे ढकलली जाऊ नये. घोडे बाजार टाळण्याचा हा सर्वोत्तम मार्ग आहे, असे म्हटले. तब्बल साडेतीन तास दोन्ही बाजूंचा युक्तिवाद ऐकून सर्वोच्च न्यायालयाने रात्री नऊ वाजता निकाल देताना बहुमत चाचणी रोखू शकत नाही, असे स्पष्ट केले. त्यामुळे महाविकास आघाडीला धक्का बसला आहे.

 

Stay Connected

1,567FansLike
188FollowersFollow
SubscribersSubscribe

ताज्या बातम्या

आणखीन बातम्या

लोकप्रिय बातम्या