गोंदिया : गोंदियामधून एक धक्कादायक घटना समोर आली आहे. आरोपीने आपली पत्नी, सासरा आणि मुलाला ते झोपेत असताना रात्रीच्या सुमारास पेट्रोल टाकून पेटवून दिले. या घटनेमध्ये सासरे देवानंद मेश्राम यांचा मृत्यू झाला आहे.
तर आरोपीची पत्नी आणि मुलगा ९० टक्के भाजले आहेत. त्यांच्यावर उपचार सुरू आहेत. घटनेनंतर आरोपी फरार झाला असून, त्याचा शोध सुरू आहे. किशोर शेंडे असे या प्रकरणातील आरोपीचे नाव आहे. त्याने हे कृत्य का केले याबाबतची माहिती अद्याप समोर येऊ शकलेली नाही. या घटनेने जिल्ह्यात खळबळ उडाली आहे.
घटनेबाबत अधिक माहिती अशी की, गोंदिया शहरातील सूर्याटोला येथे देवानंद मेश्राम (वय ५२ वर्षे) हे वास्तव्याला आहेत. त्यांच्या घरी त्यांची मुलगी आरती किशोर शेंडे (वय ३५ वर्षे) आणि नातू जय किशोर शेंडे (वय ४ वर्षे) हे रात्री झोपले होते. याचदरम्यान आरोपी किशोर शेंडे याने आपले सासरे देवानंद मेश्राम यांच्या घरी जाऊन रात्री बारा ते एक
वाजेदरम्यान पत्नी आणि सासरा झोपेत असताना त्यांच्या अंगावर पेट्रोल टाकून त्यांना पेटवून दिले. या घटनेमध्ये सासरा देवानंद मेश्राम यांचा मृत्यू झाला तर आरोपीची पत्नी आरती किशोर शेंडे व मुलगा जय शेंडे यांच्यावर नागपूरमधील रुग्णालयात उपचार सुरू आहेत.
