22.7 C
Latur
Wednesday, October 5, 2022
Homeमहाराष्ट्रमेळघाटात १ महिन्यात १८ कुपोषित बालके दगावली

मेळघाटात १ महिन्यात १८ कुपोषित बालके दगावली

एकमत ऑनलाईन

मुंबई हायकोर्टाने व्यक्त केली चिंता
अमरावती : जिल्ह्यातील मेळघाट या आदिवासी पट्ट्यात १६ वर्षांतील कुपोषणामुळे अनेक बालकांचा मृत्यू झाल्याची नोंद मुंबई उच्च न्यायालयाने बुधवारी नोंदवली. मुख्य न्यायाधीश दीपंकर दत्ता म्हणाले, आम्ही प्रामुख्याने मृत्यू का कमी होत नाहीत, या चिंतेत आहोत. २००६ मध्ये याचिका दाखल झाल्यापासून १६ वर्षांत मृत्यूच्या प्रमाणात लक्षणीय घट झालेली नाही. मुख्य न्यायाधीशांनी पालघर जिल्ह्यातील बोटोशी गावात रुग्णालय नसल्याने एका आईने जुळी मुले गमावल्याच्या घटनेचाही संदर्भ दिला. मेळघाटात एक महिन्यात १८ बालकांचा कुपोषणाने मृत्यू झाल्याचे सांगण्यात आले. त्यामुळे मुंबई उच्च न्यायालयाने चिंता व्यक्त केली.

मुख्य न्यायमूर्ती दीपंकर दत्ता आणि न्यायमूर्ती एम.एस. कर्णिक कुपोषणामुळे अनेक बालकांच्या मृत्यूशी संबंधित जनहित याचिकांवर सुनावणी करत होते. या याचिकांमध्ये मेळघाट भागातील बालके आणि गरोदर मातांसाठी तज्ज्ञ, पोषण आणि आरोग्य सुविधांची मागणी करण्यात आली. याचिकाकर्ते डॉ. राजेंद्र बर्मा यांच्या वतीने ज्येष्ठ वकील जे. जे. टी. गिल्डा म्हणाले की, १५ जुलै ते १५ ऑगस्टदरम्यान गावात १८ मुलांचा मृत्यू झाला. ते म्हणाले की, या भागात तैनात असलेले ५० टक्के डॉक्टर ड्युटीवर येत नाहीत. डॉक्टरांना कमी मानधन दिले जात आहे.

तुम्ही जे काही बोलत आहात ते गंभीर आहे. कृपया ते रेकॉर्डवर ठेवा, अशी टिप्पणीदेखील न्यायालयाने केली. गिल्डा यांनी पाण्याशी संबंधित समस्यांमुळे अनेक मृत्यूंचा उल्लेख केला. ग्रामपंचायतींच्या वीज देयकाच्या थकबाकीमुळे संबंधित गावांमध्ये पिण्यायोग्य पाणी उपलब्ध होत नसल्याचे सांगितले. आदिवासी हक्क कार्यकर्ते आणि मध्यस्थ बंडू संपतराव साने यांनी प्रत्यक्ष हजेरी लावली. ते म्हणाले की, या भागात तैनात असलेले निम्मे स्त्रीरोगतज्ज्ञ आणि बालरोगतज्ज्ञ डिसेंबरपासून येतच नाहीत. डॉक्टरांच्या निवासाच्या समस्या आहेत. मात्र, विभागांमधील समन्वयाचा अभाव ही मुख्य समस्या आहे.

मुख्य न्यायाधीश दत्ता यांनी राज्याला अल्प-मुदतीच्या योजना आणि दीर्घकालीन योजनांबद्दल विचारले, ज्याचा उल्लेख अ‍ॅडव्होकेट जनरलने गेल्या सुनावणीत केला होता. अल्पमुदतीच्या योजनांबाबत याचिकाकर्त्याच्या सूचनांचा राज्याने विचार केला असल्याची माहिती सरकारी वकील पी.पी.काकडे यांनी न्यायालयाला दिली

असाइनमेंटमध्ये संभाव्य बदल लक्षात घेऊन न्यायालयाने या प्रकरणाची सुनावणी १२ सप्टेंबर २०२२ पर्यंत पुढे ढकलली. मध्यस्थ आणि काकडे यांना समन्वय साधून आदिवासींच्या मदतीसाठी तातडीने काय उपाययोजना करता येतील हे पाहण्याचे निर्देश न्यायालयानं दिले आहेत. याबाबत अधिक माहिती जाणून घेण्यासाठी डॉक्टर राजेंद्र वर्मा आणि वकील बंड्या साने यांच्याशी संपर्क केला असता तो होऊ शकला नाही.

Stay Connected

1,567FansLike
188FollowersFollow
SubscribersSubscribe

ताज्या बातम्या

आणखीन बातम्या

लोकप्रिय बातम्या