24.7 C
Latur
Wednesday, July 6, 2022
Homeआजारी वडिलांसह सायकलवरून १,२०० किमी प्रवास!

आजारी वडिलांसह सायकलवरून १,२०० किमी प्रवास!

सायकलिंग फेडरेशनने घेतली दखल

एकमत ऑनलाईन

नवी दिल्ली: वृत्तसंस्था
आपल्या आजारी वडिलांना सायकलवर बसवून अवघ्या १५ वर्षांच्या ज्योती कुमारीने गुरुग्राम ते बिहार असा सुमारे १२०० किमीचा प्रवास केला आणि ती चर्चेचा विषय बनली. तिच्या या जिद्दीचे कौतुक आणि तिच्यात असलेली हिंमत लक्षात घेऊन सायकलिंग फेडरेशनने तिला पुढील महिन्यात चाचणीसाठी बोलावले आहे.

देशभरात कोरोनामुळे लॉकडाउन जाहीर केल्यामुळे ज्योती कुमारीला आपल्या वडिलांना बिहार येथे नेणे शक्य होत नव्हते. शेवटी तिने आपल्या वडिलांना सायकलच्या मागे असलेल्या कॅरिअरवर बसवून गुरुग्राम ते बिहार हे १२०० किमीचे अंतर कापण्याचे ठरविले. तिने हे अंतर ७ दिवसांत कापलेही. तिची ही हिंमत पाहून तिच्यातील गुणवत्तेला न्याय देता येईल का, असा विचार सायकलिंग फेडरेशनने केला आहे.

Read More  अमेरिकेकडून इशारा : ……तर आम्ही त्याला जशास तसे उत्तर देऊ

सायकलिंग फेडरेशनचे कार्याध्यक्ष ओंकार सिंग म्हणाले की, जर ज्योती कुमारी चाचणीत यशस्वीरित्या उत्तीर्ण झाली तर दिल्लीतील इंदिरा गांधी स्टेडियममधील आंतरराष्ट्रीय दर्जाच्या राष्ट्रीय सायकलिंग अकादमीत तिची प्रशिक्षणार्थी म्हणून निवड केली जाईल. भारतीय क्रीडा प्राधिकरणाच्या देखरेखीखाली ही अकादमी कार्यरत असून त्यात आशियातील सर्वोत्तम दर्जाच्या सुविधा उपलब्ध आहेत. आंतरराष्ट्रीय सायकलिंग फेडरेशनची मान्यताही या अकादमीला आहे. ओंकार सिंग ज्योती कुमारीच्या या चाचणीसंदर्भात म्हणतात की, आम्ही ज्योतीशी संवाद साधला आहे. लॉकडाउन उठविण्यात आल्यानंतर तिला पुढील महिन्यात दिल्लीत बोलावण्यात आले आहे. तिच्या प्रवासाचा, निवासाचा आणि खानपानाचा सर्व खर्च सायकलिंग फेडरेशन उचलणार आहे. तिच्यासोबत घरातून कुणी येणार असेल तर त्यालाही परवानगी देण्यात येईल. आम्ही बिहारमधील आमच्या राज्य संघटनेशी चर्चा करून तिला दिल्लीत कसे आणता येईल, याविषयी ठरवू.

ज्योती कुमारीला चाचणीला बोलावण्यामागील हेतूबद्दल सांगताना ओंकार सिंग म्हणाले की, तिच्यात काहीतरी गुणवत्ता नक्कीच आहे. तब्बल १२०० किमी प्रवास सायकलने करणे ही खचितच सोपी गोष्ट नाही. तिच्याकडे तेवढी ताकद आणि क्षमता निश्चितच आहे. त्याची चाचणी आम्हाला करून पाहावी लागेल. त्यासाठी आम्ही दिल्ली स्थित अकादमीत असलेल्या संगणकीकृत सायकलवर बसवून तिची चाचणी घेतली जाईल. तिची निवड होण्यासाठी तिला सात ते आठ निकषांची पूर्तता करावी लागेल.

एकदा का ती त्यात उत्तीर्ण झाली की मग ती प्रशिक्षणार्थी असेल. तिला कोणताही खर्च करावा लागणार नाही. आम्ही नेहमीच गुणवत्तेला न्याय देण्याचा प्रयत्न करत असतो. ओंकार सिंग म्हणाले की, सध्या आमच्या अकादमीत १४-१५ वयोगटातील १० सायकलपटू आहेत. आम्ही त्यांना घडविण्याचा प्रयत्न करत आहोत. ज्योतीचे वडील मोहन पासवान हे गुरुग्राम येथे आॅटोरिक्षा चालवतात. पण त्यांना दुखापत झाली आणि त्यांच्या उत्पन्नाचा मार्ग खुंटला. त्यांना आपली आॅटोरिक्षा मालकाला परत करावी लागली. त्यामुळे त्यांनी आपल्या मूळ गावी बिहारला जाण्याचा निर्णय घेतला. म्हणून त्यांची मुलगी ज्योती आणि ते १० मे रोजी गुरुग्रामहून सायकलने निघाले. ही सायकलही त्यांनी कसेबसे पैसे जमवून विकत घेतली. शेवटी १६ मे रोजी ते बिहारला पोहोचले.

Stay Connected

1,567FansLike
187FollowersFollow
SubscribersSubscribe

ताज्या बातम्या

आणखीन बातम्या

लोकप्रिय बातम्या