अदानी ग्रुप अडचणीत?, भारतीय रिझर्व्ह बँकेने दिले आदेश
मुंबई : हिंडेनबर्गच्या अहवालानंतर गौतम अदानी समूहाला मोठा दणका बसला आहे. अदानी समूहातील सर्व कंपन्यांच्या शेअर्समध्ये घसरण झाली आहे तर गौतम अदानी श्रीमंतांच्या यादीतून पहिल्या १० मधून बाहेर पडले आहेत. शेअरमधील होणा-या घसरणीच्या पार्श्वभूमीवर समूहाने एफपीओ मागे घेण्याचा निर्णय घेतला. अशातच आता अदानी ग्रुपला आणखी एक मोठा शॉक बसला आहे. दरम्यान, रिझर्व्ह बँकेने देशातील सर्व बँकांना अदानी ग्रुपच्या कंपन्यांना दिलेल्या कर्जाची माहिती देण्याचे आदेश दिले असल्याचे सूत्रांचे म्हणणे आहे. तसेच भारतीय बँकांनीही अदानी समूहाची चौकशी सुरू केली आहे.
अमेरिकेतील शॉर्ट सेलिंग फर्म हिंडेनबर्ग रिसर्च ने गेल्या आठवड्यात दिलेल्या अहवालानंतर आठवड्याभरात अदानी समूहाच्या सर्व सूचीबद्ध कंपन्यांचे मार्केट कॅप तब्बल १०० अब्ज डॉलरने खाली आले आहे. अदानी समूहाने अदानी एंटरप्रायझेस या प्रमुख कंपनीचा २०,००० कोटी रुपयांचा एफपीओ रद्द करण्याची घोषणा केल्यानंतर समूहाच्या सूचीबद्ध कंपन्यांच्या शेअर्समध्ये मोठी घसरण झाली. त्यामुळे कंपन्यांच्या बाजार भांडवलात घट झाली.
गुरुवारी गौतम अदानी यांची प्रमुख कंपनी अदानी एंटरप्रायझेसचा शेअर ५७० रुपयांनी घसरून १५६५ रुपयांवर आला. आरबीआयने अदानी समूहाला दिलेल्या कर्जाची बँकांकडून माहिती मागवली आहे. अदानी समूहाच्या कंपन्यांच्या शेअर्सची आठवडाभरात जोरदार विक्री झाल्यानंतर शेअर बाजार नियामक सेबी समोर आली आहे. सेबी अदानी समूहाच्या शेअर्समध्ये झालेल्या जबरदस्त घसरणीची चौकशी करत आहे. समूहाच्या इतर कंपन्यांचे शेअर्स १० टक्क्याने घसरले आहेत.
गुरुवारी सुरुवातीच्या व्यवहारात अदानी समूहाच्या १० पैकी ६ सूचीबद्ध कंपन्यांच्या शेअर्समध्ये लोअर सर्किट लागले. शेअर्सच्या प्रचंड घसरणीमुळे समूहाच्या मार्केट कॅपमध्ये मोेठी घट झाली. अदानी समूहाच्या कंपन्यांचे एकूण मार्केट कॅप २४ जानेवारी रोजी १९ लाख १६ हजार ५६० कोटी रुपये होते. आता ते १० लाख ५१ हजार ८०२ कोटी रुपयांवर आले आहे. म्हणजे अवघ्या एका आठवड्यात आदानी समूहाला ७ लाख ९ हजार ७७८ कोटी रुपयांचे नुकसान झाले.
आठवड्यात १०० अब्ज डॉलर्सचे नुकसान
आठवडाभरात अदानी समूहाच्या सर्व सूचीबद्ध कंपन्यांचे मार्केट कॅप तब्बल १०० अब्ज डॉलरने खाली आले आहे. अदानी समूहाने अदानी एंटरप्रायझेस या प्रमुख कंपनीचा २०,००० कोटी रुपयांचा एफपीओ रद्द करण्याची घोषणा केल्यानंतर समूहाच्या सूचीबद्ध कंपन्यांच्या शेअर्समध्ये मोठी घसरण झाली. त्यामुळे कंपन्यांच्या बाजार भांडवलात घट झाली. त्यामुळे अदानी समुहाला मोठा फटका बसला आहे.
