पुणे : कसबा आणि चिंचवडमध्ये पोटनिवडणुकीची जोरात तयारी सुरू आहे. या पोटनिवडणुकीच्या प्रचारासाठी अनेक नेतेमंडळी रस्त्यावर उतरली आहे. कसब्यात सध्या पोटनिवडणुकीचे वातावरण तंग आहे तर चिंचवडमध्ये तिरंगी लढत असल्याने भाजप आणि राष्ट्रवादी प्रचाराला चांगलेच भिडले आहेत.
या सगळ्या प्रचारादरम्यान नेतेमंडळी कधी वडापाव तर कधी चितळेच्या बाकरवडीवर ताव मारताना दिसत आहे. निवडणुकांचा प्रचार करून दमलेल्या कार्यकर्त्यांना हल्ली मटण, चिकनच्या पार्ट्या द्याव्या लागतात. पूर्वी मात्र भेळ, भडंग, वडापाव दिला तरी समाधान मानले जायचे.
लुप्त झालेल्या प्रथेची आठवण चिंचवड विधानसभा पोटनिवडणुकीच्या प्रचारात उतरलेल्या रोहित पवारांनी करून दिली. प्रचार म्हटलं की अनेक कार्यकर्ते, नेतेमंडळी घोषणाबाजी आणि मोठ्या पदयात्रा काढतात. सध्या पुण्यातील दोन्ही मतदारसंघांत दिवसभर हेच चित्र बघायला मिळत आहे.
यातच अनेक नेतेदेखील या प्रचाराच्या जल्लोषात सहभागी झाले आहेत. कसब्यातील प्रचारादरम्यान चंद्रकांत पाटलांनी पुण्याची राज्यात फेमस असलेल्या चितळेंच्या बाकरवडीवर ताव मारला. तर तिकडे चिंचवडमध्ये प्रचारासाठी राष्ट्रवादीची तरुण तोफ आमदार रोहित पवार यांनी थेट रस्त्यावरील खमंग आणि चविष्ट वडापाववर ताव मारला.
भाजपची तगडी फौज कसब्यात
चंद्रकांत पाटील पोटनिवडणूक जाहीर झाल्यापासून जय्यत तयारीला लागले आहेत. भाजपकडून हेमंत रासने यांना उमेदवारी देण्यात आली आहे. हेमंत रासनेंच्या प्रचारासाठी भाजपची तगडी फौज कसब्यातील रस्त्यांवर दिसत आहे. त्यातच अमित शहादेखील येणार आहेत. त्यांच्या खासगी कार्यक्रमांना ते हजेरी लावणार असले तरी ओंकारेश्वरचे दर्शन घेणार आहेत
पिंपरी-चिंचवडमध्ये तिरंगी लढत
चिंचवडमध्ये तिरंगी लढत होणार आहे. राष्ट्रवादीचे नाना काटे, भाजपच्या अश्विनी जगताप आणि सगळीकडे सध्या ज्या उमेदवाराची चर्चा सुरू आहे आणि ज्या उमेदवाराने राष्ट्रवादी आणि भाजपचे टेन्शन वाढवले आहे असे अपक्ष उमेदवार राहुल कलाटे यांच्यात तिहेरी लढत होणार आहे. या तिघांचा जोरदार प्रचार सुरू आहे. तिघांकडूनही प्रचारासाठी मोठमोठे नेते येत आहेत. रॅली, सभा, पदयात्रा काढल्या जात आहेत. या तिरंगी लढतीत नेमके कोण बाजी मारणार हे पाहणे महत्त्वाचे असणार आहे.
