28.6 C
Latur
Tuesday, May 18, 2021
Homeमहाराष्ट्रमहाड इमारत दुर्घटनेतील मृतांचा आकडा ८ वर : ५ जणांवर सदोष मनुष्यवधाचा...

महाड इमारत दुर्घटनेतील मृतांचा आकडा ८ वर : ५ जणांवर सदोष मनुष्यवधाचा गुन्हा

एकमत ऑनलाईन

महाड (प्रतिनिधी) : महाड शहरातील काजळपुरा परिसरात असलेली तारिक गार्डन ही पाच मजली इमारत सोमवारी सायंकाळी साडेसहाच्या सुमारास कोसळली. या दुर्घटनेतील मृतांचा आकडा ८ वर पोहोचला आहे. फारुख काझी आणि युनूस शेख या दोन्ही बिल्डरसह सहा जणांवर सदोष मनुष्यवधाचा गुन्हा दाखल करण्यात आला आहे. दरम्यान, या दुर्घटनेची राज्य सरकारने दखल घेतली असून मृतांच्या कुटुंबीयांना ४ लाख रुपयांची मदत देण्याचे जाहीर करण्यात आले आहे.

महाड शहरातील काजलपुरा खारखांड मोहल्ला येथील तारीक गार्डन ही इमारत कोसळली. इमारत कोसळताना मोठा आवाज झाला आणि क्षणात होत्याचे नव्हते झाले. पत्त्याची इमारत कोसळावी, तशी ही पाच माळ्यांची इमारत कोसळली. यावेळी धुराचा मोठा लोट पसरला. परिसरात नागरिकांची गर्दी जमली, इमारत अशी अचानक पडल्याने नागरिक आराडा-ओरडा आणि आक्रोश करीत होते, तर काहींनी घटनेचे गांभीर्य ओळखून तत्काळ मदत मिळावी, म्हणून नियंत्रण कक्षाशी संपर्क साधून मदतीसाठी धाव घेतली. इमारतीत ४७ कुटुंबे राहात होती. दुर्घटनेतील जखमींची नावे : नमिरा शौकत अलसूरकर (वय १९ वर्षे), संतोष सहानी (२४), फरीदा रियाज पोरे, जयप्रकाश कुमार (२४), दिपक कुमार (२१), स्वप्निल प्रमोद शिर्के (२३), नवीद हमीद दुष्टे (३२) आणि मोहम्मद बांगी (४)

 केंद्रीय गृहमंत्री अमित शाह यांनी दु:ख व्यक्त केले
मध्यरात्री एक वाजून दहा मिनिटांनी एडीआरएफचे पथक महाड येथील दुर्घटना स्थळी पोहोचून तातडीने शोधकार्याला सुरुवात केली. महाड इमारत दुर्घटनेवर केंद्रीय गृहमंत्री अमित शाह यांनी दु:ख व्यक्त केले आहे. अमित शाह यांनी ट्विट करुन म्हटलं आहे की, एनडीआरएफच्या डीजींशी संवाद साधला आहे. दुर्घटनेतील लोकांना वाचवण्यासाठी शक्य तितकी मदत करण्यात येत आहे.

 चिमुकल्याला ढिगा-याखालून सुखरुप बाहेर काढले
‘देव तारी त्याला कोण मारी’, याचा प्रत्यय रायगडमधील इमारत दुर्घटनेच्या बचावकार्यादरम्यान आला. इमारतीच्या ढिगा-याखालून मंगळवारी दुपरी लहान मुलाला सुखरुप बाहेर काढण्यात आले. तब्बल १९ तासांनंतर साडेतीन वर्षांच्या मोहम्मद बांगी या चिमुकल्याला ढिगा-याखालून सुखरुप बाहेर काढले. यावेळी सगळ्यांचाच चेहरा आनंदाने उजळून निघाला. टाळ्यांच्या कडकडाट झाला. शिवाय गणपती बाप्पा मोरयाच्या घोषणाही देण्यात आल्या. एनडीआरएफच्या जवानांना दोन पिलरमध्ये एक पाय हलताना दिसला. एका जवानांना पायाला अलगद स्पर्श करत त्याला खेचण्याचा प्रयत्न केला. त्यावेळी मोहम्मदनेही त्यांना प्रतिसाद दिला आणि काही क्षणातच एनडीआरएफच्या जवानांनी तो पिलर कटरच्या साह्याने तोडून चिमुकल्या मोहम्मदला या ढिगा-यातून सुखरुप बाहेर काढले. तब्बल १८ ते १९ तास अंधारात, उपाशी आणि भीतीच्या छायेत राहिलेल्या मोहम्मदने बाहेर आल्यानंतर एक शब्द उच्चारला तो म्हणजे ‘अम्मी आणि अब्बू’. मोहम्मदला उपचारासाठी रुग्णालयात घेऊन जाण्यात आले. तब्बल १८ तास मोहम्मदने आपल्यावर ओढावलेल्या परिस्थितीशी झुंज दिली. शेवटी तो या संकटातून बाहेर पडला.

सरकारवर विश्वास कसा ठेवणार’-आ. नितेश राणे 
राज्य सरकारने इमारत दुर्घटनेतील मृतांच्या वारसाला ४ लाख रुपयांची मदत जाहीर केली आहे. मात्र भाजपचे आमदार नितेश राणे यांनी ‘सरकारवर विश्वास कसा ठेवणार’, असा प्रश्न उपस्थित केला आहे. कारण, निसर्ग वादळाच्या तडाख्यात सापडलेल्या रायगडवासीयांना अद्यापही पूर्ण नुकसानभरपाई मिळाली नाही. आता, महाड इमारतीच्या मदतीची घोषणा या सरकारने केली आहे. पण, या विश्वासघातकी सरकारवर कसा विश्वास ठेवायचा जनतेने?, असे नितेश राणेंनी म्हटले आहे. राणे यांनी आपल्या ट्विटर अकाऊंटवरुन हा प्रश्न उपस्थित केला आहे.

वापरण्यात आलेले साहित्य हलक्या प्रतीचे
या इमारतीचे बिल्डर फारुख काझी, युनूस शेख, आरसीसी कन्सल्टंट बाहुबली धमाणे, वास्तुविशारद गौरव शहा, तत्कालीन मुख्याधिकारी दीपक जिंदाड, अभियंता शशिकांत दिघे यांच्यावर गुन्हे दाखल करण्यात आले आहेत. इमारत बांधणा-या बिल्डरने केवळ एका वर्षात ही इमारत उभी केली आहे. यासाठी वापरण्यात आलेले साहित्य हलक्या प्रतीचे असून इमारतीचे कामही तकलादू केल्यामुळेच ही दुर्घटना घडली, असे एका प्रत्यक्षदर्शीने सांगितले होते. त्यानंतर या बिल्डरवर तातडीने कारवाई करण्यात यावी, तसेच त्याच्याकडून प्रत्येक कुटुंबासाठी नुकसानभरपाई वसूल करावी अशी मागणी या इमारतीत राहणारे लोक करत होते. यातील बिल्डर फरार असल्याचे सांगण्यात आले आहे.

कोरोनाच्या लसीवर ट्रम्प यांचे भवितव्य अवलंबून?

ताज्या बातम्या

आणखीन बातम्या

1,498FansLike
190FollowersFollow
SubscribersSubscribe

लोकप्रिय बातम्या