मुंबई : अर्थसंकल्पीय अधिवेशनाचा तिस-या आठवड्याचा चौथा दिवस आहे. यावेळी विधानसभेत अमृता फडणवीस यांनी एका डिझायनरविरोधात दाखल केलेल्या तक्रारीचा मुद्दा उपस्थित करण्यात आला. यावर उपमुख्यमंत्री देवेंद्र फडणवीस यांनी स्पष्टीकरण दिले.
काही वृत्तपत्रांमध्ये पहिल्याच पानावर उपमुख्यमंत्री देवेंद्र फडणवीस यांच्याशी म्हणजेच त्यांची धर्मपत्नी अमृता फडणवीस यांच्यासंदर्भात एक बातमी आली आहे. सभागृहाला माहिती हवी आहे की या प्रकरणात सत्यता काय आहे. सर्वांना समजले पाहिजे की, हे नेमके काय प्रकरण आहे? असा सवाल विरोधी पक्षनेते अजित पवार यांनी उपस्थित केला.
हा मुद्दा उपस्थित केल्याप्रकरणी मी त्यांचे आभार मानतो. हा विषय उपस्थित केल्यामुळे वस्तुथिती सभगृहास मांडता येईल. माझ्या पत्नीने अशा प्रकारचा एक एफआयआर फाईल केला आहे की, तिच्यावर दबाव आणून माझ्या माध्यमातून काही काम करून घेण्याकरिता त्या ठिकाणी प्रयत्न झाला. पहिल्यांदा पैसे ऑफर करण्यात आले. त्यानंतर ब्लॅकमेल करण्यात आले.
याची वस्तुस्थिती अशी आहे की, अनिल जयसिंघानीया नावाचा व्यक्ती कदाचित ७-८ वर्षे फरार आहे. त्याच्यावर १४ -१५ गुन्हे दाखल आहेत. त्याची मुलगी आहे. ती शिकलेली आहे. कधीतरी १५-१६ च्या दरम्यान अमृताला भेटत होती. नंतर तिचे येणे बंद झाले आणि अचानक २०२१ साली ती मुलगी पुन्हा भेटली.
त्यावेळी ती, मी डिझायनर आहे. ज्वेलरी तयार करते आणि बेस्ट पॉवरफुल वुमेन्समध्ये माझे नाव आले आहे. त्यानंतर माझी आई वारली आहे. मी तिच्यावर पुस्तक लिहिले आहे. तुम्ही त्याचे प्रकाशन करा, असे सांगत तिने विश्वास संपादन केला. त्यानंतर येणे-जाणे सुरू केले. त्यातून विश्वास संपादित झाला. त्यानंतर तिने माझ्या वडिलांना काही चुकीच्या केसेसमध्ये फसवण्यात आले आहे आणि तुम्ही त्यांना सोडवा, असे म्हटले.
माझ्या पत्नीने तिला सांगितले, तुझे जे काही निवेदन आहे ते फडणवीसांना देऊन टाक. सरकार बदलल्यानंतर त्या मुलीने माझ्या वडिलांना फसवण्यात आले आहे. तुम्ही मदत करा, असे म्हटले. काही दिवसांनी तिने माझे वडील सगळ्या बुकिजना ओळखतात, असे सांगितले.
मागील काळात आम्ही काही बुकिजची माहिती देत होतो आणि मग तिथे रेड होत होती.
त्यावेळी आम्हाला दोन्हीकडून पैसे मिळत. तुम्ही जर थोडी मदत केली तर आपणही अशा रेड कंडक्ट करू. तेव्हा माझ्या पत्नीने गंभीर दखल न घेता असल्या फालतू गोष्टी आम्ही करत नाही. असे उत्तर दिले. त्यानंतर एक दिवस पुन्हा तिने सांगितले. अशा प्रकारे काम केले तर आपल्याला फायदा होईल. मला मदत करा नाहीतर मी तुम्हाला १ कोटी रुपये देते तुम्ही माझ्या वडिलांना सोडवा.
माझ्या पत्नीने स्पष्ट सांगितले ते चुकीने फसले असतील. पोलिसांकडून त्यांना सोडवण्यात येईल. त्यानंतर वारंवार बुकिजचा विषय निघत गेला. त्यानंतर माझ्या पत्नीने तिला ब्लॉक केले. त्यानंतर अज्ञात नंबरवरून व्हीडीओ, ऑडिओ, मेसेज येऊ लागले.
या व्हीडीओमध्ये अत्यंत गंभीर व्हीडीओ दिसला. त्यामध्ये ती बॅगेत पैसे भरते आणि ती बॅग आमच्या घरी काम करणा-या बाईला देते आणि त्यासोबत धमकी देखील दिली. हे व्हीडीओ टाकले तर तुमच्या नव-याची नोकरी जाईल. माझे सर्व पक्षांशी संबंध आहेत. तुम्ही तात्काळ आम्हाला मदत करा. हे माझ्या पत्नीने मला सांगितले. मी लगेच पोलिसांना बोलावले. पण एफआयआर पब्लिक नाही केला. पोलिसांनी सांगितले होते. पोलिसांच्या फॉरेन्सिक रिपोर्टमधून धक्कादायक माहिती समोर आली. त्यानंतर त्यांनी कबूल केले. त्यावेळी त्यांनी काही पोलिसांसह राजकीय नेत्यांची नावे घेतली.
मागच्या सीपींच्या काळात आमच्या केसेस परत घेण्याची कारवाई सुरू होती. तुम्ही आल्यावर थांबली. आता जर तुम्ही आमच्या केसेस वापस नाही केल्या तर आम्ही उलटे सांगयला सुरुवात करू. यातील काही गोष्टी रेकॉर्ड करण्यात आल्या आहेत.
पण पोलिसांकडे सर्व गोष्टी नोंदवण्यात आल्या आहेत. आता एफआयआर दाखल करण्यात आला आहे. त्या मुलीने ज्या प्रकारच्या हिंट दिल्या आहेत त्यातून असे लक्षात येते की मला आणि माझ्या कुटुंबाला अडकवण्याचा प्रयत्न करण्यात आला आहे. पण ईश्वरकृपा. त्या मुलीचे अनेक मोठ्या नेत्यांशी संबंध आहेत.
