बेंगळुरू: वृत्तसंस्था
देशात एकीकडे कोरोना संकटाशी लढाई सुरू असताना दुसरीकडे, कॉंग्रेस-भाजपमध्ये राजकीय संघर्षही सुरू आहे. या पार्श्वभूमीवर, कॉंग्रेस अध्यक्ष सोनिया गांधी यांच्याविरूद्ध कर्नाटकातील शिमोगा जिल्ह्यात पंतप्रधान केअर फंडाशी संबंधित, तसेच इतर आरोपांविरोधात एफआयआर दाखल करण्यात आला आहे. सोशल मीडियावर काँग्रेस पक्षाकडून चुकीची माहिती पसरवली जात असल्याचा आरोप एफआयआरमध्ये करण्यात आला आहे.
११ मे रोजी काँग्रेस पक्षाने खोटे दावे करत केंद्र सरकारवर खोटे आरोप केले गेले, असा आरोप एफआयआरमध्ये करण्यात आला आहे. काँग्रेस पक्षाने पंतप्रधान केअर फंडाशी संबंधित काही आरोप केले होते. या आरोपांचा उल्लेख करत हे आरोप चुकीचे असल्याचे एफआयआरमध्ये म्हटले आहे.
काँग्रेस अध्यक्ष सोनिया गांधी यांच्याविरोधात आयपीसीच्या कलम १५३, ५०५ अंतर्गत हा एफआयआर दाखल करण्यात आला आहे. सोनिया गांधींवर कायदेशीर कारवाई झाली पाहिजे, अशी मागणी एफआयआरमध्ये करण्यात आली आहे. प्रवीण नावाच्या स्थानिक वकिलाने हा एफआयआर दाखल केला आहे.
Read More बीड जिल्ह्यातील एका कुटूंबासह क्वारंटाईन केलेल्या 14 जणांनी ठोकली धूम
विशेष म्हणजे कोरोना संकटाच्या पार्श्वभूमीवर काँग्रेस पक्ष सतत मोदी सरकारवर आरोपांचा भडिमार करत आहे. मोदी सरकार राज्यांना सापत्न वागणूक देत असल्याचा आरोपही काँग्रेस करत आला आहे. पंतप्रधान केअर्स फंडाची माहिती सार्वजनिक करावी अशी मागणीही सतत काँग्रेस पक्षाकडून केली जात आहे. कॉंग्रेस अध्यक्ष सोनिया गांधी आणि काँग्रेस नेते राहुल गांधी यांनी सोशल मीडियाच्या माध्यमातून या मुद्द्यावर सतत टीका केली जात आहे. त्याच बरोबर पंतप्रधान नरेंद्र मोदी यांनाही काँग्रेसच्यावतीने पत्रही लिहिले गेले आहे.
काँग्रेस अध्यक्ष सोनिया गांधी यांनी यापूर्वी या संदर्भात काँग्रेस शासित राज्यांच्या मुख्यमंत्र्यांसमवेत बैठक घेतली होती. या बरोबरच आगामी काळात, देशातील विरोधी पक्षांशी एकत्रित बैठक घेण्याची काँग्रेसने तयारी सुरू केली आहे. या बैठकीत कोरोना संकटाविषयी चर्चा करण्यात येणार आहे.
