नवी दिल्ली : ओडिशात झालेल्या रेल्वे अपघातात आतापर्यंत २७५ जणांचा मृत्यू झाला आहे, तर जखमींवर वेगवेगळ्या रुग्णालयात उपचार सुरू आहेत. या दुर्घटनेत मृत्युमुखी पडलेल्या लोकांचे पार्थिव त्यांच्या घरी नेण्यासाठी केंद्र सरकारने मोठा निर्णय घेतला आहे. नागरी उड्डाण मंत्री ज्योतिरादित्य शिंदे यांनी एअरलाइन्स सल्लागार गटाशी झालेल्या बैठकीत विमान कंपन्यांना मृतांचे पार्थिव शरीर त्यांच्या शहरांमध्ये मोफत नेण्याचे आदेश दिले आहेत.
भविष्यात कोणत्याही भागात आपत्तीजन्य परिस्थिती निर्माण झाल्यास त्या शहरात जाण्यासाठी आणि जाणा-या विमानांच्या तिकिटांच्या किमतीवर विमान कंपन्यांनी लक्ष ठेवावे, असा निर्णयही या बैठकीत घेण्यात आला आहे आणि मानवतावादी आधारावर कोणत्याही किंमतीत तिकीट दर वाढू नयेत यासाठी प्रयत्न करण्यात येणार आहेत. विशेष म्हणजे, काही दिवसांपूर्वी केंद्र सरकारने ओडिशा रेल्वे अपघाताबाबत एअरलाइन्ससाठी आणखी एक अ‍ॅडव्हायजरी जारी केली होती. केंद्र सरकारच्या नागरी उड्डयन मंत्रालयाने भुवनेश्वरला जाण्यासाठी आणि तेथून विमान भाड्यात कोणत्याही असामान्य वाढीवर लक्ष ठेवून विमान कंपन्यांना एक सल्लागार पाठवला होता. ओडिशातील दुर्दैवी रेल्वे अपघाताच्या पार्श्वभूमीवर, नागरी उड्डाण मंत्रालयाने सर्व विमान कंपन्यांना भुवनेश्वर आणि राज्यातील इतर विमानतळांवर हवाई भाड्यात कोणत्याही असामान्य वाढीवर लक्ष ठेवण्याचा आणि या संदर्भात आवश्यक कारवाई करण्याचा सल्ला दिला गेला होता.