24.2 C
Latur
Tuesday, July 5, 2022
Homeराष्ट्रीयराहुल गांधींची ईडी कार्यालयात चौकशी सुरू

राहुल गांधींची ईडी कार्यालयात चौकशी सुरू

एकमत ऑनलाईन

नवी दिल्ली : नॅशनल हेराल्ड प्रकरणात राहुल गांधी यांची ईडी कार्यालयात चौकशी केली जात आहे. राहुल यांच्यासोबत पायी मोर्चा काढून काँग्रेस मुख्यालयातून बाहेर पडलेल्या काँग्रेस नेत्यांना एक किलोमीटर आधीच थांबवण्यात आल्याने ते रस्त्यावरच धरणे धरून बसले. पोलिसांनी राजस्थानचे मुख्यमंत्री अशोक गेहलोत, छत्तीसगडचे मुख्यमंत्री भूपेश बघेल, काँग्रेस खासदार रणदीप सिंग सुरजेवाला आणि इतर नेत्यांना ताब्यात घेतले आहे. या नेत्यांना भेटण्यासाठी प्रियंका गांधी तुघलक रोड पोलिस स्टेशनमध्ये पोहोचल्या गेल्या.

ईडी कार्यालयात जात असताना दिल्ली पोलिसांनी मल्लिकार्जुन खर्गे, जयराम रमेश, मुकुल वासनिक, दिग्विजय सिंह, दीपेंद्र हुडा, पवन खेरा, पीएल पुनिया, गौरव गोगोई, मीनाक्षी नटराजन यांच्यासह काँग्रेस नेत्यांना ताब्यात घेतले. मध्य दिल्लीतून बसमध्ये बसवून या नेत्यांना दूर नेण्यात आले.

राहुल-प्रियांका एकत्र निघाले होते
राहुल गांधींच्या हजेरीपूर्वी प्रियांका गांधी वाड्रा त्यांना भेटण्यासाठी त्यांच्या घरी पोहोचल्या होत्या. येथून राहुल-प्रियांका काँग्रेस मुख्यालयात पोहोचल्या आणि पक्षाच्या नेत्यांची बैठक घेतली. बैठकीनंतर राजस्थानचे मुख्यमंत्री अशोक गेहलोत, छत्तीसगडचे मुख्यमंत्री भूपेश बघेल यांच्यासह पक्षाचे खासदार आणि इतर नेते पायी चालत ईडी कार्यालयाकडे रवाना झाले. पोलिसांनी बॅरिकेड्स लावून काँग्रेसचा मोर्चा थांबवला आणि नेत्यांना पुढे जाऊ दिले नाही. राहुल गांधी प्रियांकांसोबत कारने ईडीच्या मुख्यालयात पोहोचले होते.

ईडी कार्यालयाजवळ थ्री-लेयर सुरक्षा व्यवस्था आहे. काँग्रेसचा मोर्चा पहिल्या सर्कलजवळ पोलिसांनी रोखला होता. येथे कार्यकर्त्यांची पोलिसांशी झटापटही झाली. त्यांना पुढे जाण्यापासून रोखले असता, नेते व कार्यकर्त्यांनी रस्त्यावर बसून आंदोलन सुरू केले. पोलीस या नेत्यांना उचलून व्हॅनमध्ये बसवत आहेत.

याआधी सोमवारी सकाळी राहुल गांधींच्या चौकशीविरोधात आंदोलन करणा-या काँग्रेस कार्यकर्त्यांना दिल्ली पोलिसांनी काँग्रेस मुख्यालयातून ताब्यात घेतले. पोलिसांनी काँग्रेस कार्यकर्त्यांना बसमध्ये बसवले होते. काँग्रेसचा पवित्रा पाहता दिल्ली पोलिसांनी काँग्रेस मुख्यालय ते ईडी कार्यालयापर्यंतचा रस्ता सील केला होता.

चौकशी प्रकरणात नेत्यांच्या प्रतिक्रिया
अशोक गेहलोत : शांततापूर्ण मोर्चा काढण्यात सरकारला काय अडचण आहे?
भूपेश बघेल : तुम्ही या शरीराचा नाश करू शकता, पण विचारांना कैद करू शकत नाहीत.
प्रमोद तिवारी : राहुल गांधींवर खोटा गुन्हा दाखल करण्यात आला.
दिग्विजय सिंह : मोदी घाबरतात तेव्हा ते ईडीला पुढे करतात.
सचिन पायलट : केंद्र सरकार एजन्सीचा गैरवापर करत आहे.
शिवसेना नेते संजय राऊत : राहुल गांधींवरील कारवाई बेकायदेशीर आहे. जो कोणी भाजपच्या विरोधात बोलेल त्याच्यावर कारवाई केली जाते.
रॉबर्ट वाड्रा : राहुल गांधी सर्व बिनबुडाच्या आरोपातून निर्दोष मुक्त होतील आणि सत्याचा विजय होईल.
कार्ती चिदंबरम : मला बहुतेक वेळा ईडीच्या नोटिसा मिळाल्या आहेत. मी ईडी प्रकरणातील काँग्रेसचा तज्ज्ञ आहे.

प्रश्नांची लांबलचक यादी तयार
राहुल गांधींना चौकशीसाठी ईडीने प्रश्नांची एक लांबलचक यादी तयार केली आहे. सुमारे दोन डझन प्रश्न ईडीचे अधिकारी विचारतील, जे सर्व नॅशनल हेराल्ड आणि यंग इंडिया कंपनीशी संबंधित आहेत. राहुल गांधी आणि त्यांच्या मातोश्री सोनिया गांधी यांची यंग इंडिया कंपनीत ३८-३८% हिस्सेदारी आहे. उर्वरित काँग्रेस नेते मोतीलाल व्होरा आणि ऑस्कर फर्नांडिस यांच्याकडे आहे. या दोन्ही नेत्यांचे निधन झाले आहे.

ईडीने सोनियांनाही बोलावले
ईडीने काँग्रेसच्या अंतरिम अध्यक्षा सोनिया गांधी यांना २३ जून रोजी चौकशीसाठी बोलावले आहे. यापूर्वी ८ जून रोजी त्यांना चौकशीसाठी बोलावण्यात आले होते, मात्र १ जून रोजी त्या कोरोना पॉझिटिव्ह आढळल्या होत्या. त्यामुळे त्या हजर होऊ शकल्या नाहीत. दरम्यान, रविवारी कोरोनामुळे सोनियांची प्रकृती खालावली. त्यांच्यावर दिल्लीतील सर गंगाराम रुग्णालयात उपचार सुरू आहेत.

Stay Connected

1,567FansLike
187FollowersFollow
SubscribersSubscribe

ताज्या बातम्या

आणखीन बातम्या

लोकप्रिय बातम्या