अहमदाबाद : आयपीएलच्या सोळाव्या मोसमाचा विजेता कोण, धोनीची चेन्नई सुपर किंग्स की हार्दिक पांड्याची गुजरात टायटन्स या प्रश्नाचे उत्तर रविवारी मिळणार होते. परंतु येथे जवळपास चार ते पाच तास जोरदार पाऊस पडला. पंचांनी रात्री ११ वाजेपर्यंत सामना सुरू होण्याची वाट पाहिली. पण पावसाने विश्रांती घेतली नाही. त्यामुळे आता राखीव दिवशी म्हणजेच सोमवारी हा महामुकाबला रंगणार आहे. पण सोमवारी पावसाने उसंत घेतली नाही, तर गुजरातला जेतेपद देण्यात येणार आहे. कारण साखळी फेरीत गुजरातचा संघ पहिल्या क्रमांकावर होता.
सोमवारी रात्री साडेसात वाजता सामन्याला सुरुवात होणार आहे. यंदाच्या मोसमात हार्दिक आणि धोनीच्या दोन्ही फौजा तिस-यांदा आमनेसामने उभ्या ठाकणार होत्या. चेन्नईचा कर्णधार महेंद्रसिंग धोनीच्या कारकिर्दीतला कदाचित हा अखेरचा आयपीएल सामना ठरण्याची शक्यता आहे. त्यामुळे चेन्नईचे शिलेदार धोनीला विजेतेपदाची भेट देण्याचा प्रयत्न करतील. दरम्यान, गुजरात टायटन्सने लागोपाठ दुस-या वर्षी आयपीएलच्या फायनलमध्ये धडक मारली आहे. आयपीएलच्या मागच्या मोसमात गुजरातने राजस्थान रॉयल्सला नमवून विजेतेपद पटकावले होते. यंदा त्या पराक्रमाची पुनरावृत्ती करण्याचा गतविजेत्या गुजरातचा प्रयत्न राहील. पण चारवेळा आयपीएल जिंकणा-या चेन्नईचे यंदा गुजरातसमोर तगडे आव्हान आहे. या पार्श्वभूमीवर आयपीएलच्या फायनलमध्ये चेन्नई आणि गुजरात संघांमध्ये कांटे की टक्कर पाहायला मिळण्याची चिन्हे आहेत. एकीकडे क्रिकेटप्रेमींची उत्सुकता शिगेला पोहोचली आहे. मात्र दुसरीकडे सामन्यावर पावसाचे सावट असल्याचे चित्र पाहायला मिळाले.