नवी दिल्ली: पंतप्रधान नरेंद्र मोदी यांनी राष्ट्रवादी काँग्रेसला ‘नॅचरल करप्ट पार्टी’ असे म्हटले होते. राष्ट्रवादी काँग्रेसने ७० हजार कोटी रुपयांचा भ्रष्टाचार केल्याचा आरोप त्यांनी केला होता. आता राष्ट्रवादी काँग्रेसच्या नेत्या सुप्रिया सुळे यांनी पंतप्रधान नरेंद्र मोदींवर या आरोपावरून हल्लाबोल केला आहे. त्या म्हणाल्या की, राष्ट्रवादी काँग्रेस ‘भ्रष्टाचारी पक्ष असल्याची चौकशी करा, या चौकशीला माझ्या पक्षाचा पूर्ण पाठिंबा राहील, असे त्या म्हणाल्या आहेत. संसदेच्या विशेष अधिवेशनात खासदार सुप्रिया सुळे यांनी भाषण केले.
यावेळी त्या म्हणाल्या की, गेल्या लोकसभा निवडणुकीत महाराष्ट्रात प्रचार करताना पंतप्रधान मोदींनी एनसीपी म्हणजे नॅचरल करप्ट पार्टी असे संबोधले होते. तसेच काही दिवसांपूर्वी मध्यप्रदेशात एका जाहीर सभेत बोलताना एनसीपीने ७० हजार कोटींचा घोटाळा केल्याचा आरोप केला होता. या आरोपानंतर काही दिवसानंतरच अजित पवार यांनी राष्ट्रवादी काँग्रेसमध्ये फूट पाडून उपमुख्यमंत्रीपदाची शपथ घेतली आहे. सुळे म्हणाल्या की, पंतप्रधानांनी केलेल्या या आरोपांची चौकशी झाली पाहिजे. माझ्या पक्षाचा या चौकशीला संपूर्ण पाठिंबा राहिला. आता चौकशीच करून घ्या, असे आव्हान त्यांनी पंतप्रधानांना दिले आहे. या आव्हानाचे एनसीपीच्या इतर सदस्यांनी स्वागत केले आहे.