चंद्रपूर : केंद्रीय मंत्री नितीन गडकरी यांची भाजपमध्ये घुसमट होत आहे. त्यांना येणा-या काळात आणखी साईडलाईन करण्यात येणार असल्याचा खळबळजनक दावा ठाकरे सेनेचे नेते चंद्रकांत खैरे यांनी केला आहे. नितीन गडकरी यांच्याच गोटातून याबाबत चर्चा ऐकल्याचेही खैरे म्हणाले.
नाव आणि निवडणूक चिन्ह गमावल्यानंतर ठाकरे गट अधिक आक्रमक झाल्याचे पाहायला मिळत आहे. उद्धव ठाकरे यांच्या नेतृत्वाखाली मुंबईत झालेल्या बैठकीत सर्व आमदार, खासदार, नेते, पदाधिका-यांना महाराष्ट्र पिंजून काढण्याचे आदेश देण्यात आले आहेत. त्यानुसार २६ फेब्रुवारी ते ३ मार्च दरम्यान, राज्याच्या विविध भागात शिवगर्जना अभियान सुरू करण्यात आले आहे.
मराठवाड्यातील नेते चंद्रकांत खैरे यांच्यावर विदर्भाची जबाबदारी सोपवण्यात आली आहे. खैरे आजपासूनच विदर्भाच्या दौ-यावर असून शिवगर्जनेच्या माध्यमातून ते लोकांशी संवाद साधणार आहेत. चंद्रपूर येथे प्रसारमाध्यमांशी संवाद साधताना चंद्रकांत खैरे यांनी नितीन गडकरींबाबत मोठे वक्तव्य केले आहे.
चंद्रकांत खैरे म्हणाले, शिवसेना पक्षप्रमुखांच्या आदेशानुसार आम्ही शिवसंवाद यात्रा करत आहोत. मी गडचिरोलीचा दौरा करणार आहे. प्रत्येकाला ४-४ जिल्हे देण्यात आले आहेत. गडचिरोलीशी माझा चांगला परिचय आहे. मात्र महाराष्ट्रात आज वेगळी परिस्थिती निर्माण झाली आहे. आमचे ४० गद्दार भाजपला सहभागी झाले आणि आपली चूल पेटवली.
