बेंगळुरू: ज्येष्ठ शास्त्रीय गायिका श्यामला भावे यांचे शुक्रवारी सकाळी येथील निवासस्थानी निधन झाले. त्या ७९ वर्षांच्या होत्या. हिंदुस्थानी शास्त्रीय संगीत व कर्नाटकी संगीत अशा दोन्ही प्रमुख प्रकारांवर त्यांचे प्रभुत्व होते. या वैशिष्ट्यामुळे मैसूर संस्थानातर्फे त्यांना उभय गान विदुषी ही उपाधी प्रदान करण्यात आली होती.
Read More माळेगाव कारखान्यात वायूगळती; १३ कामगार अत्यवस्थ
श्यामला भावे या काही काळापासून आजारी होत्या. तीन दिवसांपूर्वी त्यांना रुग्णालयातून सोडण्यात आले होते. अविवाहित असणा-या या गायिकेसोबत अंतिम क्षणी त्यांची अमेरिकास्थित लहान बहिण निर्मला होती, अशी माहिती त्यांच्या कुटुंबीयांनी दिली. संगीतकला ही त्यांच्या रक्तातच होती. ज्येष्ठ गायक गोविंद विठ्ठल भावे हे त्यांचे वडील. हिंदुस्थानी शास्त्रीय संगीताची मुळाक्षरे त्यांनी वडिलांच्याच मार्गदर्शनाखाली गिरवली.
त्यांची आई लक्ष्मी भावे यादेखील एक उत्तम शास्त्रीय गायिका होत्या. ए. सुब्बाराया व बी. दोरेस्वामी या ज्येष्ठ गायकांकडून त्यांनी कर्नाटक संगीत आत्मसात केले. वयाच्या सहाव्या वर्षीच त्यांनी एका संगीत स्पर्धेत प्रथम क्रमांक मिळवला होता व वयाच्या बाराव्या वर्षापासून त्यांनी गाण्यांचे कार्यक्रम करण्यास सुरुवात केली.
