पुणे : शिवसेना खासदार संजय राऊत यांना जीवे मारण्याची धमकी देण्यात आली आहे. दिल्लीत आल्यावर एके-४७ ने उडवून टाकू, असा धमकीचा मेसेज राऊतांना आला आहे. लॉरेन्स बिश्नोई गँगकडून धमकी मिळाली आहे. संजय राऊत धमकी प्रकरणी पुण्यातून दोन जणांना ताब्यात घेतले आहे. काल राऊत यांच्या मोबाईलवर धमकीचे मेसेज आले होते.
दरम्यान, संजय राऊत यांच्या घरी चौकशीसाठी पोलिस आले आहेत. पण सध्या संजय राऊत हे ‘सामना’ ऑफिसमध्ये गेले असून घरी त्यांचे भाऊ आमदार सुनील राऊत आहेत. सुनील राऊत यांच्याकडे पोलिसांकडून चौकशी केली जात आहे. संजय राऊत यांना धमकी दिल्याप्रकरणी पुण्यातून राहुल तळेकर या
तरुणाला पुण्यातील गुन्हे शाखेने काल रात्री उशिरा अटक केली आहे. ही अटक पुण्यातील खराडी भागातून करण्यात आली आहे. मुंबई पोलिस आणि पुणे पोलिस यांच्या गुन्हे शाखेने संयुक्त कारवाई केली आहे. राहुल तळेकरला पुणे पोलिसांच्या गुन्हे शाखेने मुंबई पोलिसांच्या ताब्यात दिले आहे.
धमकीबाबत गृहमंत्री चेष्टा करतात
महाराष्ट्रातील सगळी सुरक्षा व्यवस्था ही गद्दार गटाचे आमदार, खासदार, त्यांचे पदाधिकारी यांच्या सुरक्षेसाठी लावण्यात आली आहे. मुंबईसह महाराष्ट्रात होणा-या दंगली, महाराष्ट्रात महिलांवर होणारे अत्याचार अशा घटना घडत आहेत. पण राज्याचे मुख्यमंत्री आणि उपमुख्यमंत्र्यांना या घटनांकडे पाहायला वेळ नाही. आम्ही जेव्हा अशा प्रकारच्या धमक्यांची माहिती देतो तेव्हा गृहमंत्री चेष्टा करतात. आमचा स्टंट असल्याचे ते बोलतात. मला ठाण्यातून आलेल्या धमकीत मुख्यमंत्र्यांच्या नातेवाईकांचे नाव आहे. ही गोष्ट तुम्ही गांभीर्याने घेत नाही. काल रात्रीसुद्धा मला एक धमकी आल्याचे राऊत म्हणाले.
धमकी देणारा माणूस पकडला : देवेंद्र फडणवीस
संजय राऊत यांना आलेली धमकी देणारा माणूस पकडला आहे. मिळालेल्या प्राथमिक माहितीनुसार दारूच्या नशेत त्या व्यक्तीने संजय राऊत यांना धमकी दिली आहे. या प्रकरणाचा संपूर्ण तपास केला जाईल. धमकी देणा-यावर योग्य ती कारवाई केली जाईल. महाराष्ट्रात कोणी कोणाला धमकी दिली तरीदेखील याठिकाणी सरकार आणि पोलिस शांत बसणार नाहीत. असे फडणवीस यावेळी म्हणाले.