वाराणसी : उत्तर भारतात श्रावण महिना सुरू झाला आहे. श्रावण महिन्याच्या पहिल्या सोमवारी वाराणसीतील काशी विश्वनाथ मंदिरात दर्शन देण्याच्या नावाखाली भक्तांची फसवणूक करणा-या एका बोगस पुजा-याला पोलिसांनी अटक केली आहे. बसंत पांडे नावाच्या एका व्यक्तीने कर्नाटकातील म्हैसूर येथील नंदिनी, तिचा पती विनायक आणि त्यांच्या दोन साथीदारांकडून व्हीआयपी दर्शनाचे आश्वासन देत ऑनलाइन ४,००० रुपये घेतले होते. पैसे घेतल्यानंतर आरोपी फरार झाला. पीडितेच्या तक्रारीवरून पोलिसांनी तात्काळ आरोपीला अटक करून पुढील कारवाईसाठी पोलिस ठाण्यात नेले.
वाराणसी पोलिसांनी श्रावण महिन्याच्या पहिल्या सोमवारी काशी विश्वनाथ मंदिरात व्हीआयपी दर्शन देण्याच्या नावाखाली भाविकांची फसवणूक करणा-या एका बोगस पुजा-याला अटक केली आहे. श्रावण महिन्याच्या पहिल्या सोमवारी काशी विश्वनाथांच्या दर्शनासाठी आणि जलाभिषेकासाठी चार ते पाच तास लागतात. वेळेअभावी, बाहेरून येणारे शिवभक्त अनेकदा मंदिर परिसरात फिरणा-या फसवणूक करणा-यांचे बळी ठरतात. मंदिराला भेट देण्यासाठी आलेल्या म्हैसूर येथील एका महिलेने अशाच एका घटनेबाबत पोलिसांना माहिती दिली.
दर्शनासाठी पैशाची मागणी
मंदिर परिसरात श्रावण ड्युटीवर असलेले पोलिस निरीक्षक शिवकांत मिश्रा यांनी सांगितले की म्हैसूर येथील एका महिलेने तक्रार केली होती की, बसंत पांडे नावाच्या व्यक्तीने लवकर दर्शन मिळवून देण्याच्या बहाण्याने चार जणांना ४,००० रुपये घेतले. भाविकांकडून ऑनलाइन ट्रान्सफर करून तो फरार झाला.
तक्रारीनंतर शोधमोहिम
निरीक्षकांनी सांगितले की महिलेच्या तक्रारीनंतर शोधमोहीम सुरू करण्यात आली आणि फसवणूक करणा-याला तात्काळ अटक करण्यात आली. महिलेच्या खात्यात ४,००० रुपये तात्काळ परत करण्यात आले. त्यानंतर बसंत पांडेला पुढील कारवाईसाठी चौक पोलिस ठाण्यात नेण्यात आले. पोलिसांनी त्या महिलेला आणि तिच्या सोबत आलेल्यांना मंदिरात विश्वनाथांच्या दर्शनाची व्यवस्था करून दिली. त्या महिलेने आणि तिच्या पतीने पोलिस अधिका-याचे आभार मानले.
