नवी दिल्ली/ मुंबई : प्रतिनिधी
दहीहंडी, पोळा आणि गणेशोत्सव हे महत्त्वाचे सण तोंडावर असतानाच महागाईचा बॉम्ब फुटला आहे. सप्टेंबर महिना सुरू झाला तो महागाई आणि दरवाढ घेऊनच! दोन आठवड्यांपासून साखर किलोमागे तब्बल २० रुपयांनी महागली आहे, गूळ, वेलची अगोदरच महागले आहे. हे कमी म्हणून की काय मंगळवारपासून एक लिटर दुधासाठी आता ९ रुपये जास्त मोजावे लागत आहेत. शिवाय व्यावसायिक गॅस सिलिंडर, पाईपलाईनने पुरवला जाणारा गॅस, सीएनजी, रिक्षा आणि टॅक्सीचे भाडेही महागले आहे. यात महागलेल्या कुरिअर डिलिव्हरीचाही समावेश करावा लागेल.
१ सप्टेंबरपासून देशाच्या विविध भागांत व्यावसायिक एलपीजी सिलिंडर, सीएनजी आणि पीएनजीच्या दरात वाढ लागू झाली आहे. तेल विपणन कंपन्यांनी १९ किलोच्या व्यावसायिक एलपीजी सिलिंडरच्या किमतीत प्रति सिलिंडर ९.५० रुपये एवढी वाढ केली आहे. ही वाढ लगेचच लागू झाली आहे. दिल्लीमध्ये १९ किलोच्या व्यावसायिक एलपीजी सिलिंडरची किंमत आता २,७३८ वरून वाढून २,७४७.५० रुपये झाली आहे. चेन्नईमध्ये ही किंमत वाढून २,९१६.५० रुपये झाली आहे. तसेच ५ किलोच्या मानक एलपीजी सिलिंडरच्या दरातही २ रुपयांची वाढ झाली आहे. या दरवाढीचा थेट परिणाम रेस्टॉरंट, हॉटेल, ढाबे, मिठाईची दुकाने आणि स्वयंपाक तसेच इतर कामांसाठी व्यावसायिक एलपीजी वापरणा-या अशाच प्रकारच्या इतर व्यवसायांवर होईल. १४.२ किलोच्या घरगुती एलपीजी सिलिंडरचे दर वाढलेले नाहीत.
सीएनजी २ रुपयांनी महागले
मुंबईत सीएनजी आणि घरगुती पीएनजीचे (पाईपलाईन गॅस) दरही वाढले आहेत. मुंबईतील सीएनजी आणि पीएनजी दरातील वाढीचे कारण ‘इनपुट गॅस’च्या (कच्च्या गॅसच्या) वाढत्या किमतीत आहे. महानगर गॅस लिमिटेडने मुंबई आणि आसपासच्या परिसरातील सीएनजीच्या दरात प्रति किलो २ रुपयांनी वाढ केली आहे. ही दरवाढ सोमवार (३१ ऑगस्ट) मध्यरात्रीनंतर लागू झाली आहे. परिणामी, मुंबई आणि लगतच्या भागात सीएनजीचा नवीन दर आता प्रति किलो ८८ रुपये झाला आहे. पश्चिम आशियातील संकटामुळे गॅसच्या किमतीत मोठी वाढ झाली आहे. त्यामुळे ही दरवाढ करावी लागत असल्याचे महानगर गॅस लिमिटेडकडून सांगण्यात येते.
पीएनजीच्या युनिटमध्ये रुपयाची वाढ
मुंबईत पाईपलाईनने पुरवला जाणारा घरगुती गॅसच्या दरातही प्रति स्टँडर्ड क्युबिक मीटर एक रुपयाची वाढ करण्यात आली आहे. या दरवाढीचा परिणाम सुमारे ३० लाख घरगुती पीएनजी ग्राहकांवर होईल. गॅसच्या वाढत्या खर्चामुळे पीएनजीच्या दरात बदल करणे आवश्यक असल्याचे महानगर गॅस लिमिटेडने स्पष्ट केले आहे.
दूध ९ रुपयांनी महागले
मुंबई दूध उत्पादक संघटनेने म्हशीच्या सुट्या दुधाच्या दरात कधी नव्हे एवढी विक्रमी वाढ जाहीर केली आहे. आतापर्यंत ९३ रुपये प्रति लिटर मिळणारे दूध आता थेट १०२ रुपये प्रति लिटर झाले आहे. पशुखाद्य आणि चा-याचे दर तब्बल २५ टक्क्यांनी वाढल्यामुळे हा निर्णय घेण्यात आला आहे. हे दर १ सप्टेंबरपासून २८ फेब्रुवारी २०२७ पर्यंत लागू राहतील. त्यामुळे चहा, मिठाई आणि रोजच्या दुधावर याचा मोठा आर्थिक भार पडणार आहे.
रिक्षा-टॅक्सी प्रवास महागला
रिक्षा आणि टॅक्सीच्या दरात देखील १ सप्टेंबरपासून वाढ करण्यात आली आहे. काळी-पिवळी टॅक्सीचे पहिल्या १.६ किलोमीटरसाठी ३१ रुपयांवरून ३३ रुपये करण्यात आले आहे. शिवाय प्रति किलोमीटरच्या टप्प्यावरही किरकोळ दरवाढ लागू झाली आहे. वाढत्या महागाईसोबत मुंबई महापालिकेकडून शहरातील सार्वजनिक ‘पे अँड पार्क’ दरांमध्येही १० टक्क्यांपर्यंत वाढ करण्याची तयारी सुरू आहे.
कुरिअर महागले
ऑनलाईन शॉपिंग आणि कुरिअर सेवेवरही महागाईचा परिणाम झाला आहे. प्रमुख कुरिअर कंपनीने एक्स्प्रेस शिपिंगवर ४ रुपये आणि रस्ता वाहतूक (सरफेस) शिपिंगवर २ रुपये प्रति पार्सल शुल्क वाढवले आहे. त्यामुळे ई-कॉमर्स कंपन्या आणि ग्राहकांनाही याचा अतिरिक्त भुर्दंड सोसावा लागणार आहे.
