रोम : इटलीत कॅलाब्रियाच्या दक्षिणेकडील किना-यावर संशयास्पद बोट तुटल्यामुळे मोठी दुर्घटना घडली आहे. इटालियन वृत्तसंस्थांनी रविवार दि. २६ फेब्रुवारी रोजी सांगितले की, दक्षिण इटलीतील समुद्रकिना-यावर ३० जणांचे मृतदेह सापडले असून सर्वजण बुडाल्याची भीती व्यक्त करण्यात येत आहे.
अधिका-यांनी किना-याजवळ मृतदेह तरंगताना पाहिले. इटलीच्या दक्षिण किनारपट्टीवर स्थलांतरित बोट उलटल्यानंतर इटालियन तटरक्षकांनी सुमारे ३० मृतदेह पाहिले. कॅलाब्रियामधील क्रोटोन या किनारी शहराजवळ समुद्रात बोट बुडाली, तेव्हा ही बोट १०० हून अधिक स्थलांतरितांना घेऊन जात होती असे अधिका-यांनी सांगितले.
४० जण जिवंत आढळले
बचाव अधिकारी लुका कॅरी यांनी सांगितले की, वाचवण्यात आलेल्या ४० पैकी अनेक जण जखमी झाले आहेत. बचावकार्य अजूनही सुरूच आहे. एजीआयने ३० मृतदेह बाहेर काढले आणि मृतांमध्ये काही महिन्यांचे एक बाळ असल्याचे सांगितले. तटरक्षक दल, सीमा पोलिस आणि अग्निशमन दलाचे जवान बोटीच्या बचाव कार्यात गुंतल्याचे रेडिओ अहवालात म्हटले आहे. स्थलांतरित कोठून आले याबद्दल अहवालात तपशील देण्यात आलेला नाही.
