नोएडा : उत्तर प्रदेशातील बहुप्रतिक्षित जेवर आंतरराष्ट्रीय विमानतळावरून सोमवारी पहिल्या व्यावसायिक उड्डाणाचे संचालन सुरू झाले. या ऐतिहासिक क्षणाचे साक्षीदार होण्यासाठी विमानतळासाठी आपली जमीन दिलेल्या १७२ हून अधिक शेतकरी आणि शेतमजुरांना विशेष निमंत्रण देण्यात आले. हे सर्वजण नोएडाहून विमानाने लखनौ विमानतळावर पोहोचले.
जेवर विमानतळ प्रकल्पासाठी हजारो एकर जमीन संपादित करण्यात आली होती. या प्रकल्पाच्या उभारणीत स्थानिक शेतकऱ्यांचे मोठे योगदान असल्याने प्रशासनाने आणि विमानतळ प्राधिकरणाने पहिल्या व्यावसायिक उड्डाणात त्यांना सहभागी करून त्यांच्या योगदानाचा गौरव केला. विमानप्रवासाचा अनुभव प्रथमच घेणाऱ्या अनेक शेतकऱ्यांनी यावेळी आनंद व्यक्त केला.
विमानतळाच्या उद्घाटनानंतर सुरू झालेल्या पहिल्या कमर्शियल फ्लाइटमध्ये सहभागी झालेल्या शेतकऱ्यांचे विमानतळावर विशेष स्वागत करण्यात आले. अनेकांनी हा क्षण आपल्या आयुष्यातील अविस्मरणीय अनुभव असल्याचे सांगितले. काही शेतकऱ्यांनी आपल्या जमिनीच्या बदल्यात मिळालेल्या भरपाईसह विकासकामांमध्ये सहभागाची भावना व्यक्त केली.
सरकारच्या या निर्णयाचे विविध स्तरांवर स्वागत होत आहे. जमीन अधिग्रहणामुळे प्रभावित झालेल्या कुटुंबांचा सन्मान करण्याचा हा सकारात्मक प्रयत्न असल्याचे मत व्यक्त केले जात आहे. तर काहींचे म्हणणे आहे की, केवळ सन्मान नव्हे तर अशा प्रकल्पांमध्ये जमीन देणाऱ्या शेतकऱ्यांना रोजगार, शिक्षण आणि दीर्घकालीन सुविधांचाही लाभ मिळायला हवा.
देशातील सर्वात मोठ्या विमानतळ प्रकल्पांपैकी एक मानल्या जाणाऱ्या जेवर आंतरराष्ट्रीय विमानतळामुळे उत्तर प्रदेशाच्या आर्थिक विकासाला गती मिळणार असल्याचा विश्वास व्यक्त केला जात आहे. तसेच दिल्ली-एनसीआर परिसरातील वाढती हवाई वाहतूक क्षमता लक्षात घेता हा विमानतळ महत्त्वाची भूमिका बजावणार आहे.
