23.6 C
Latur
Tuesday, October 4, 2022
Homeमहाराष्ट्रविधान परिषदेतही भाजपचाच सभापती?

विधान परिषदेतही भाजपचाच सभापती?

एकमत ऑनलाईन

भाजपची व्युहरचना, राज्यपालांच्या सदस्य नियुक्तीनंतर होऊ शकते निवडणूक
मुंबई : उद्धव ठाकरे यांच्या नेतृत्वाखालील महाविकास आघाडी सरकार पाडत भाजपने शिवसेनेचे बंडखोर नेते एकनाथ शिंदे यांच्या मदतीने राज्याची सत्ता काबीज केली. मुख्यमंत्रिपद जरी एकनाथ शिंदे यांच्याकडे असले तरी विधानसभा अध्यक्षपदासह मंत्रिमंडळातील महत्त्वाची खाती आपल्याकडे ठेवत भाजपने सरकारमधील आपले वर्चस्व सिद्ध केले आहे. या घडामोडींमुळे आधीच बॅकफूटवर गेलेल्या महाविकास आघाडीला आणखी एक धक्का देण्यासाठी भाजप नेतृत्वाकडून व्यूहरचना आखली जात असल्याची माहिती समोर आली आहे.

विधानसभेनंतर विधानपरिषदेतही निर्विवाद वर्चस्व प्रस्थापित करण्यासाठी या सभागृहाच्या सभापतीपदावर आपल्या पक्षाचा नेता बसावा, यासाठी भाजपने हालचाली सुरू केल्या आहेत. सभागृहाच्या कामकाजावरील पकड घट्ट करण्यासाठी सभापतीपद मिळवण्याचा भाजपचा प्रयत्न असणार आहे. या पदासाठी विधानपरिषद आमदार राम शिंदे यांचे नाव आघाडीवर असल्याची सूत्रांची माहिती आहे. खरे तर राम शिंदे यांचे नाव भाजपच्या प्रदेशाध्यपदासाठी चर्चेत होते. मात्र पक्षनेतृत्वाने या पदासाठी चंद्रशेखर बावनकुळे यांच्यावर विश्वास टाकला. त्यामुळे आता सभापतीपदाच्या निवडणुकीत उमेदवारी देऊन भाजपकडून राम शिंदे यांना संधी दिली जाण्याची शक्यता आहे.

आकड्यांचे गणित
विधानपरिषदेत एकूण ७८ सदस्य असतात. सद्यस्थितीत या सभागृहात भाजपकडे २४, तर शिवसेनेकडे ११ आणि राष्ट्रवादी आणि काँग्रेसकडे प्रत्येकी १० जागा आहेत. तसेच १६ जागा रिक्त आहेत. यामध्ये राज्यपाल नियुक्त १२ जागांचाही समावेश आहे. राज्यात भाजप-शिंदे गटाची सत्ता असल्याने या १२ जागांवर मंत्रिमंडळाने सुचवलेल्या नावांवर राज्यपाल भगतसिंह कोश्यारी यांच्याकडून लवकरच शिक्कामोर्तब केले जाईल. त्यामुळे भाजपचे संख्याबळ वाढून ३६ वर पोहोचणार आहे. तसेच रासपचा एक आणि एका अपक्ष आमदाराच्या जोरदावर भाजपची एकूण संख्या ३८ पर्यंत जाण्याची शक्यता आहे, तर दुसरीकडे महाविकास आघाडीतील तीनही पक्ष एकत्र आले तरी त्यांची संख्या ३१ इतकीच होते. शेकाप आणि अन्य काही पक्षांनी महाविकास आघाडीला साथ दिली तरी त्यांच्याकडे जास्तीत जास्त ३६ इतके आमदार होऊ शकतात. त्यामुळे सभापतीपदाच्या निवडणुकीत भाजपचे पारडे जड असणार आहे.

Stay Connected

1,567FansLike
188FollowersFollow
SubscribersSubscribe

ताज्या बातम्या

आणखीन बातम्या

लोकप्रिय बातम्या