22.7 C
Latur
Wednesday, July 6, 2022
Homeमहाराष्ट्रमुंबई उपनगरात होणार राज्यातील सर्वांत मोठी टाऊनशिप

मुंबई उपनगरात होणार राज्यातील सर्वांत मोठी टाऊनशिप

एकमत ऑनलाईन

मुंबई : अंबरनाथ शहरात म्हाडाकडून राज्यातली सर्वांत मोठी टाऊनशिप उभारण्यात येणार आहे. यासाठी चिखलोली धरणाला लागून असलेल्या २०० एकर जागेचा आज म्हाडाच्या अधिका-यांकडून सर्व्हे करण्यात आला. गृहनिर्माणमंत्री जितेंद्र आव्हाड यांनी ही माहिती दिली आहे.

मुंबई उपनगर परिसराची लोकसंख्या सध्या झपाट्याने वाढत चालली आहे. मात्र, हा वाढता भर मुंबईला पेलवणारा नाही. त्यात सध्या डोंबिवलीपुढे, म्हणजे फक्त अंबरनाथ आणि बदलापूरमध्येच मोकळ्या जागा शिल्लक आहेत. त्यामुळे या परिसरात म्हाडाकडून मेगा टाऊनशिप उभारण्यात येणार असल्याचे गृहनिर्माणमंत्री जितेंद्र आव्हाड यांनी सांगितले.

ही टाऊनशिप आजवर म्हाडाने उभारलेल्या टाऊनशिपपैकी महाराष्ट्रातली सगळ्यात मोठी टाऊनशिप असेल, असे जितेंद्र आव्हाड म्हणाले. अंबरनाथ शहरात आतापर्यंत म्हाडाचा एकही प्रकल्प उभारण्यात आलेला नाही. मात्र, या परिसरात जी कनेक्टिव्हिटी आहे, त्यामुळे या भागाला सध्या अनन्यसाधारण महत्त्व आले आहे. त्यामुळेच चिखलोली धरणाच्या बाजूला असलेली २०० एकर जागा खरेदी करण्याचा म्हाडाचा विचार आहे.

या जागेत आजवर म्हाडाकडून उभारण्यात आलेल्या टाऊनशिपपैकी महाराष्ट्रातली सर्वांत मोठी टाऊनशिप उभारली जाणार असल्याचे गृहनिर्माणमंत्री जितेंद्र आव्हाड म्हणाले. अंबरनाथ शहरात एका कार्यक्रमानिमित्त आलेले असताना त्यांनी ही माहिती दिली. ज्या जागेवर हा प्रकल्प उभारण्याचा विचार आहे, त्या चिखलोलीच्या प्रस्तावित जागेचा आज म्हाडाच्या अधिका-यांकडून ड्रोन सर्व्हे करण्यात आला. यावेळी म्हाडाचे मुख्य कार्यकारी अधिकारी डॉ. नितीन महाजन हे स्वत: उपस्थित होते.

दरम्यान, या सर्वांत मोठ्या टाऊनशिपसाठी जपानच्या शासकीय कंपनीसोबत बोलणी सुरू असल्याचे जितेंद्र आव्हाड म्हणाले. आपल्या कारकीर्दीत एखादा मोठा प्रकल्प व्हावा, अशी प्रत्येक मंत्र्याची इच्छा असते. त्यामुळे हा प्रकल्प झाला तर एक वेगळा आनंद मिळणार असून पवार साहेबांचा विकासाचा दृष्टिकोन इथे कामाला येईल, असे जितेंद्र आव्हाड म्हणाले. अंबरनाथमध्ये ही टाऊनशिप झाली तर ती शहराच्या विकासासाठी महत्त्वाची ठरेल.

Stay Connected

1,567FansLike
187FollowersFollow
SubscribersSubscribe

ताज्या बातम्या

आणखीन बातम्या

लोकप्रिय बातम्या