पिंपरी : ‘शंकरशेठ मला मुलासारखे आहेत. आमच्या घरात कुठलेही मतभेद नाहीत. विरोधकांकडून वाद असल्याच्या वावड्या उठत असल्याची प्रतिक्रिया चिंचवड पोटनिवडणुकीतील उमेदवार अश्विनी जगताप यांनी दिली आहे.
दरम्यान, पुण्यातील चर्चेतील पोटनिवडणूक कसबा आणि चिंचवडमध्ये भाजपने उमेदवार जाहीर केले आहेत. हेमंत रासने यांना कसब्यातून तर चिंचवडमध्ये अश्विनी जगताप यांना उमेदवारी देण्यात आली आहे.
उमेदवारी जाहीर झाल्यानंतर अश्विनी जगताप यांची पहिली प्रतिक्रिया आली आहे. देवेंद्र फडणवीस यांच्या मार्गदर्शनाखाली आम्ही निवडणूक लढवण्याचा निर्णय घेतला आहे. माझे कुटुंब माझ्याबरोबर आहे. शिंदे गट, भाजप कार्यकर्ते, आरपीआय या सर्वांचा मला पाठिंबा आहे.
पुढे बोलताना जगताप म्हणाल्या, माझी विरोधकांना हात जोडून विनंती आहे. त्यांनी माझ्या घरात वाद असल्याची वावटळ उठवली आहे. माझ्या घरात कोणतेही वाद नाहीत. शंकरशेठ मला मुलासारखे आहेत. साहेब (लक्ष्मण जगताप) आणि मी नेहमी म्हणायचो, मला एक मुलगी नाही. आम्हाला सहा मुलं आहेत.
गेली तीस वर्षे झाली आमचं एकत्र कुटुंब आहे. प्रत्येक निर्णय आम्ही एकत्र घेतला. त्यामुळे जगताप कुटुंबात वाद आहेत, कुटुंब वेगळं आहे, असा विचारही विरोधकांनी करू नये. ही त्यांना आग्रहाची विनंती असल्याचे अश्विनी जगताप म्हणाल्या.
