परभणी (प्रतिनिधी) : परभणी-हिंगोली स्थानिक स्वराज्य संस्था मतदारसंघाच्या निवडणुकीत महायुतीने आपला झेंडा रोवत मोठे यश संपादन केले आहे. महायुतीचे उमेदवार सईद खान यांनी पहिल्या पसंतीची सर्वाधिक मते मिळवत प्रतिस्पर्ध्यांवर निर्णायक आघाडी घेत दणदणीत विजय मिळवला आहे.
सोमवारी (२२ जून) जिल्हाधिकारी कार्यालयात सकाळपासून कडेकोट पोलीस बंदोबस्तात मतमोजणी प्रक्रिया पार पडली. जिल्हाधिकारी संजयसिंह चव्हाण तसेच निवडणूक निरीक्षकांच्या उपस्थितीत मतमोजणी करण्यात आली. निकाल जाहीर होताच महायुतीच्या कार्यकर्त्यांनी जल्लोष करत विजयाचा आनंद साजरा केला.
अधिकृत निकालानुसार, महायुतीचे उमेदवार सईद खान यांना २४२ मते मिळाली. तर महाविकास आघाडीचे उमेदवार डॉ. विवेक नांदर यांना १५९ मते मिळाली. अपक्ष उमेदवार सुशीलकुमार देशमुख यांना ५६ मतांवर समाधान मानावे लागले. याशिवाय ८ मते बाद ठरली. एकूण ४६५ मतांची मोजणी करण्यात आली.
सईद खान यांनी पहिल्या पसंतीच्या मतांमध्ये स्पष्ट आघाडी घेत विजय निश्चित केला. स्थानिक स्वराज्य संस्थांमधील प्रतिनिधींचा पाठिंबा महायुतीच्या बाजूने गेल्याचे या निकालातून स्पष्ट झाल्याचे राजकीय विश्लेषकांचे मत आहे.
या विजयामुळे परभणी आणि हिंगोली जिल्ह्यांतील महायुतीच्या संघटनात्मक ताकदीला बळ मिळाले असून आगामी स्थानिक आणि विधानसभा निवडणुकांच्या पार्श्वभूमीवर हा निकाल महत्त्वाचा मानला जात आहे. दुसरीकडे, महाविकास आघाडीसाठी हा निकाल आत्मपरीक्षणाची संधी ठरणार असल्याची चर्चा राजकीय वर्तुळात सुरू झाली आहे.
स्थानिक स्वराज्य संस्थांमधील राजकीय समीकरणे बदलण्याची क्षमता असलेल्या या निकालामुळे मराठवाड्यातील आगामी राजकीय घडामोडींना वेग येण्याची शक्यता व्यक्त केली जात आहे. विजय मिळताच सईद खान यांनी मतदारांचे आभार मानत विकासकामांना प्राधान्य देण्याची ग्वाही दिली.
