मुंबई : प्रतिनिधी
चेन्नईतील एका खासगी स्टुडिओमध्ये ‘जेलर २’चे शूटिंग सुरू होते. यावेळी आर्ट डिपार्टमेंटमध्ये काम करणारे कार्तिकेयन नावाचे कर्मचारी घरासारखा सेट तयार करण्याचे काम करत होते. सेट उभारणीदरम्यान अचानक विजेचा प्रवाह सुरू झाल्याने त्यांना जोरदार करंट बसला. घटनास्थळी उपस्थित असलेल्या सहका-यांनी त्यांना तातडीने वाचवण्याचा प्रयत्न केला, मात्र तोपर्यंत खूप उशीर झाला होता. डॉक्टरांनी त्यांना मृत घोषित केले.
स्थानिक कनाथुर पोलिसांनी या घटनेची प्राथमिक चौकशी सुरू केली आहे. पोलिसांच्या माहितीनुसार, सेटवर नेमकी वीज लीक कशी झाली आणि सुरक्षेच्या उपाययोजनांमध्ये काही हलगर्जीपणा झाला होता का, याचा तपास केला जात आहे.
दरम्यान, चित्रपटाच्या टीमकडून किंवा निर्मात्यांकडून अद्याप अधिकृत प्रतिक्रिया देण्यात आलेली नाही. नेल्सन दिलीपकुमार दिग्दर्शित हा चित्रपट ‘जेलर’ या सुपरहिट चित्रपटाचा सिक्वेल आहे. २०२३ मध्ये प्रदर्शित झालेल्या ‘जेलर’ने बॉक्स ऑफिसवर जबरदस्त यश मिळवत जगभरात ६०० कोटी रुपयांहून अधिक कमाई केली होती.
‘जेलर २’मध्ये रजनीकांत पुन्हा एकदा ‘टायगर’ मुथुवेल पांडियन या दमदार भूमिकेत दिसणार आहेत. अभिनेत्री राम्या कृष्णन त्यांच्या पत्नी विजया यांच्या भूमिकेत पुनरागमन करणार आहेत. तसेच शिव राजकुमार आणि मोहनलाल यांचे विशेष कॅमिओदेखील चित्रपटात पाहायला मिळणार आहेत. याशिवाय मिथुन चक्रवर्ती हे देखील महत्त्वाच्या भूमिकेत झळकणार आहेत. अद्याप ‘जेलर २’च्या प्रदर्शनाची अधिकृत तारीख जाहीर करण्यात आलेली नाही.
