नवी दिल्ली : विमान प्रवाशांसाठी महत्त्वाची बातमी आहे. ‘इंडिगो’ने देशांतर्गत आणि आंतरराष्ट्रीय विमानांच्या तिकिटांवरील इंधन शुल्कात वाढ करण्याचा निर्णय घेतला आहे. विमान इंधन म्हणजेच एव्हिएशन टर्बाइन फ्युएलच्या वाढत्या किमतींचा परिणाम या निर्णयावर झाला आहे.
इंडिगोने दिलेल्या माहितीनुसार, ६ ऑक्टोबर २०२६ रोजी मध्यरात्री १२.०१ नंतर होणा-या नवीन बुकिंगसाठी सुधारित इंधन शुल्क लागू होईल. त्यानंतर विमानाचे तिकीट बुक करणा-या प्रवाशांना पूर्वीच्या तुलनेत अधिक पैसे मोजावे लागू शकतात.
गेल्या काही दिवसांत विमान इंधनाच्या किमतीत मोठी वाढ झाली आहे. मध्य पूर्वेतील वाढत्या भू-राजकीय तणावाचा परिणाम कच्च्या तेलाच्या किमतीवर झाला आहे. त्याचा थेट परिणाम जेट फ्युएलच्या किमतीवरही झाला आहे.
जेट फ्युएलच्या किमतीत १४ टक्क्यांहून अधिक वाढ झाली असून, विमान इंधनाचे दर गेल्या दशकातील उच्चांकी पातळीवर पोहोचले आहेत. विमान कंपन्यांच्या एकूण खर्चात इंधनाचा मोठा वाटा असल्याने अळऋ महागल्याचा परिणाम तिकिटांच्या दरांवर होणे अपेक्षित होते.
देशांतर्गत आणि आंतरराष्ट्रीय उड्डाणांवर परिणाम
इंडिगोने देशांतर्गत तसेच आंतरराष्ट्रीय विमानांसाठी इंधन शुल्क वाढवले आहे. मात्र, प्रवाशांवर एकदम मोठा आर्थिक भार पडू नये, यासाठी मर्यादित स्वरूपात शुल्कवाढ करण्यात आल्याचे कंपनीने म्हटले आहे. नवीन शुल्क केवळ ६ ऑक्टोबरच्या मध्यरात्री १२.०१ नंतर होणा-या नवीन बुकिंगला लागू होणार आहे.
















