श्रीनगर : दिल्लीतील दहशतवादी स्फोटाच्या प्रकरणासंदर्भात राष्ट्रीय तपास यंत्रणेने(एनआयए) सोमवारी काश्मीरमध्ये सुमारे १० ठिकाणी छापे टाकले. एजन्सीने मौलवी इरफान अहमद, डॉ. आदिल, डॉ. मुजम्मिल, आमिर रशीद आणि जसीर बिलाल यांच्या घरावर धाडी टाकल्या आहेत.
एनआयएची छापेमारी शोपियानमधील नादिगाम गाव, पुलवामामधील कोइल, चंदगाम, मलंगपोरा, संबूरा आणि कुलगाम येथे सुरू आहे. पथके अशा पुराव्यांच्या शोधात आहेत जे व्हाईट कॉलर दहशतवादी नेटवर्क आणि दिल्ली स्फोटाशी संबंधित असू शकतात. केंद्रीय तपास यंत्रणा डॉ. उमर नबीचा साथीदार जसीर बिलाल याच्या घरावरही तपास करत आहे. जसीर हा दिल्ली स्फोटातील मुख्य सह-षडयंत्रकर्त्यांपैकी एक मानला जात आहे. त्याने अनंतनाग जिल्ह्यातील काझीगुंड येथून राज्यशास्त्रात पदवी घेतली आहे.
तो उमरसोबत मिळून हमासप्रमाणे भारतात ड्रोन हल्ल्यांचे नियोजन करत होता. दिल्ली कार स्फोटात एनआयएने मौलवी इरफान, डॉ. आदिल, जसीर बिलाल यांच्यासह ७ जणांना आतापर्यंत अटक केली आहे. यापैकी ५ जण जम्मू-काश्मीरचे रहिवासी आहेत. स्फोटात स्वत:ला उडवून देणारा डॉ. उमरही पुलवामाचा रहिवासी होता. तो फरीदाबादमधील अल-फलाह विद्यापीठात सहाय्यक प्राध्यापक होता.
