नवी दिल्ली : ऑपरेशन सिंदूरनंतर पाकिस्तानने भारताच्या विरोधात लढण्यासाठी एक धोकादायक आणि स्वस्त युद्ध मॉडेल स्वीकारले आहे. संरक्षण सूत्रांनुसार, या ऑपरेशननंतर पाकिस्तानकडून ८०० हून अधिक ड्रोन भारतीय हवाई हद्दीत पाठवण्यात आले. याला लो लेव्हल ड्रोन वॉरफेअर असे म्हणतात.
सूत्रांनी सांगितले की, या केवळ तुरळक घटना नाहीत, तर भारताची हवाई संरक्षण आणि अँटी-ड्रोन शील्ड तपासण्याच्या लष्करी रणनीतीचे हे संकेत आहे. हे ड्रोन कमी उंचीवर उडतात, ज्यामुळे ते रडारला चकमा देऊ शकतात. बहुतेक ड्रोन राजस्थान आणि पंजाबच्या सीमेवर दिसले. भारतीय सुरक्षा दलांनी ८०० पैकी सुमारे २४० ड्रोन पाडले. ५ ड्रोनमध्ये शस्त्रे किंवा युद्धाशी संबंधित साहित्य सापडले. १६० हून अधिक ड्रोन इतर वस्तू टाकण्यासाठी आले होते, तर सुमारे ७२ ड्रोन अंमली पदार्थ घेऊन आले होते. या वर्षी जानेवारीमध्ये आतापर्यंत ड्रोन घुसखोरीच्या १२ घटना समोर आल्या आहेत.
दहशतवाद्यांच्या मदतीसाठी पाळत
सूत्रांनुसार, बहुतेक ड्रोन पाळत ठेवण्यासाठी आले होते. त्यांचा उद्देश भारतीय लष्कराची तैनाती आणि त्याचे स्वरूप शोधणे हा होता. पाकिस्तान अशा पाळतीद्वारे दहशतवाद्यांच्या घुसखोरीचे मार्ग शोधत राहिला आहे. महासंचालक स्तरावरील हॉटलाइनवरील चर्चेत भारताने ड्रोन हालचालींवर आक्षेप नोंदवला आहे. खबरदारी म्हणून भारतीय लष्कर आणि वायुसेना काउंटर ड्रोन सिस्टीम खरेदी करत आहेत. डिफेन्स कंपनी आयजी डिफेन्सकडून हँडहेल्ड अँटी ड्रोन जॅमर खरेदी करेल. डीआरडीओने तयार केलेले १६ अँटी ड्रोन लेझर सिस्टीम खरेदी केले जात आहेत. हे पाक सीमा आणि एलओसीवर तैनात केले जातील.
सीमेवर ड्रोनच्या ५ घटना
राजस्थान आणि पंजाब सीमेव्यतिरिक्त, जम्मू-काश्मीरमध्ये गेल्या २ आठवड्यांत एलओसी जवळ पाकिस्तानी ड्रोन दिसल्याच्या पाच घटना घडल्या आहेत. ड्रोन दिसल्यानंतर लष्कराने प्रत्युत्तर म्हणून आपली अँटी ड्रोन सिस्टीम सक्रिय केली होती. त्यानंतर ड्रोन पाकिस्तानकडे परतले होते. २० जानेवारी रोजी कठुआ जिल्ह्यात नियमित गस्तीदरम्यान दिसला होता. यापूर्वी १७ जानेवारी रोजी रामगड सेक्टरमध्ये, १५ जानेवारी रोजीही रामगड सेक्टरमध्ये एकदा, १३ जानेवारी रोजी राजौरी जिल्ह्यात दोनदा आणि ११ जानेवारी रोजी नौशेरा सेक्टर, धरमसाल सेक्टर, रियासी, सांबा आणि पूंछच्या मनकोट सेक्टरमध्ये एकाच वेळी पाच ड्रोन दिसले होते.
