नागपूर : प्रतिनिधी
आफ्रिकी देशांमध्ये धुमाकूळ घालणा-या इबोलाच्या नव्या घातक विषाणूच्या पार्श्वभूमीवर, केंद्र सरकारच्या आदेशानंतर नागपूर विमानतळ हायअलर्टवर आले आहे. मंगळवारी युगांडावरून नागपुरात परतलेल्या एका ४७ वर्षीय प्रवाशाला खबरदारीचा उपाय म्हणून थेट २१ दिवसांसाठी ‘होम आयसोलेशन’मध्ये (विलगीकरणात) ठेवण्यात आले आहे. संबंधित प्रवाशामध्ये सध्या कोणतीही लक्षणे नसली, तरी नागपूर महानगरपालिकेचे आरोग्य पथक पुढील २१ दिवस त्यांच्या प्रकृतीवर २४ तास बारीक लक्ष ठेवून असणार आहे.
आफ्रिकी देशांमध्ये ‘इबोला’ विषाणूच्या नव्या व अत्यंत घातक अशा ‘बुन्डिबुग्यो’ स्ट्रेनचा प्रादुर्भाव वेगाने वाढत आहे. या संघटनेने (डब्ल्यूएचओ) आंतरराष्ट्रीय पार्श्वभूमीवर जागतिक आरोग्य स्तरावर ‘सार्वजनिक आरोग्य आणीबाणी’घोषित केली आहे. या गंभीर जागतिक परिस्थितीची दखल घेत केंद्र सरकारने भारतीयांना इबोलाचा प्रादुर्भाव असलेल्या देशांमध्ये प्रवास न करण्याचा सल्ला दिला आहे. दरम्यान, नागपूर विमानतळावर खबरदारीचा उपाय म्हणून प्रशासनाने पावले उचलण्यास सुरुवात केली आहे.
लक्षणे नाहीत, संपर्कातही नाही
मनपाचे वैद्यकीय अधिकारी डॉ. दीपक सेलोकर यांनी सांगितले, युगांडा देशातून प्रवास करून मंगळवारी नागपुरातील विमानतळावर दाखल झालेल्या पुरुषाला कोणतेही लक्षणे नाहीत. प्रवाशाला विचारपूस केल्यावर त्याने इबोला रुग्णाच्या संपर्कात आले नसल्याचेही सांगितले आहे. मार्गदर्शक तत्त्वानुसार त्यांना पुढील सलग २१ दिवस घरीच विलगीकरणाचा सूचना देण्यात आल्या आहेत. यादरम्यान रोज ओराग्य विभाग त्यांच्या प्रकृतीची चौकशी करणार आहे. लक्षणे दिसताच मेडिकलमध्ये दाखल केले जाईल.
‘बुन्डिबुग्यो स्ट्रेन’ घातक
इबोला हा एक व्हायरल हॅम्रेजिंग फीव्हर म्हणजेच शरीराच्या आतून आणि बाहेरून रक्तस्त्राव घडवून आणणारा अत्यंत गंभीर आजार आहे. या आजारात मृत्यूचे प्रमाण अत्यंत उच्च असते. चिंतेची बाब अशी की, सध्या ‘बुन्डिबुग्यो’ या विशिष्ट स्ट्रेनवर जगात कोणतीही अधिकृत लस किंवा विशिष्ट औषधोपचार उपलब्ध नाही.
