मुंबई : पुण्याचे माजी महापौर आणि राष्ट्रवादी शरदचंद्र पवार पक्षाचे माजी पुणे शहराध्यक्ष प्रशांत जगताप यांनी आज अखेर काँग्रेसमध्ये प्रवेश केला आहे. पवारांच्या राष्ट्रवादीची साथ सोडल्यानंतर प्रशांत जगताप यांना विविध पक्षांकडून ऑफर देण्यात आली होती. मात्र पुरोगामी विचारधारेशी ठाम असणा-या पक्षासोबत आपली पुढील राजकीय वाटचाल असेल असे त्यांनी स्पष्ट केले होते. त्यानुसार आज मुंबईतील टिळक भवनात जगताप यांनी काँग्रेसचा झेंडा हाती घेतला आहे. या पक्षप्रवेश सोहळ्याला काँग्रेस प्रदेशाध्यक्ष हर्षवर्धन सपकाळ, विजय वडेट्टीवार यांच्यासह काँग्रेसचे इतर महत्त्वाचे नेते उपस्थित होते.
पुणे महानगरपालिका निवडणुकीच्या पार्श्वभूमीवर राष्ट्रवादी शरदचंद्र पवार पक्षाने उपमुख्यमंत्री अजित पवार यांच्या नेतृत्वाखालील राष्ट्रवादीसोबत आघाडी करण्याच्या हालचाली सुरू केल्याने प्रशांत जगताप नाराज होते. भाजपची साथ देणा-या कोणत्याही पक्षासोबत आघाडी करण्याचा निर्णय होत असले तर मी बाजूला होतो, अशी भूमिका घेत प्रशांत जगताप यांनी पवारांच्या राष्ट्रवादीतून बाहेर पडण्याचा निर्णय घेतला. त्यानंतर संविधान रक्षणासाठी लढणा-या आणि पुरोगामी विचारांशी एकनिष्ठ असलेल्या पक्षात मी प्रवेश करेन, असे त्यांनी स्पष्ट केले होते. त्यानुसार आज त्यांनी काँग्रेस प्रवेशाचा निर्णय घेतला आहे.
उद्धव ठाकरेंकडूनही ऑफर
शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांनी प्रशांत जगतापांना फोन करून पक्षप्रवेशाची ऑफर दिली होती. याबाबत बोलताना जगताप म्हणाले होते की, “मी उद्धव ठाकरे आणि सचिन अहिर यांचे आभार मानतो. माझ्यासारख्या छोट्या कार्यकर्त्याशी बोलायला त्यांनी वेळ दिला. या राज्यातील आक्रमक चेहरा आणि भाजपशी दोन हात करण्याची तयारी असलेले नेते माझ्याशी फोनवर बोलले. त्यांनी माझ्या भावना समजून घेतल्या. तुम्ही आमच्या पक्षात काम करू शकता, असे त्यांनी सांगितलं. मात्र आज मी माझ्या राजकीय जीवनाचा योग्य तो निर्णय घेणार आहे असे जगताप यांनी स्पष्ट केले होते.
