नवी दिल्ली : राहुल गांधींनी ‘सत्याग्रह’ वेबसाईट लॉन्च केली आहे. त्यांनी सांगितले की, याचा उद्देश संघर्ष करणा-या आणि विरोध करणा-या लोकांना आवाज देणे हा आहे. त्यांनी लोकांना आपली गोष्ट शेअर करण्याचे आवाहन केले आहे.
काँग्रेसचे माजी अध्यक्ष आणि लोकसभेतील विरोधी पक्षनेते राहुल गांधी यांनी शनिवारी ‘सत्याग्रह’ नावाच्या एका नव्या मंचची सुरुवात केली. या मंचचा उद्देश देशभरात आपल्या हक्कांसाठी आणि न्यायासाठी संघर्ष करणा-या लोकांचा आवाज एका सामायिक मंचावर आणणे हा आहे. राहुल गांधींनी महात्मा गांधी यांच्या जयंतीनिमित्त याची सुरुवात केली आणि यासंदर्भातील वेबसाईटची लिंकही शेअर केली.
त्यांनी एक व्हीडीओ जारी करून म्हटले, जेन झी, विद्यार्थी, शेतकरी, आदिवासी, दलित, महिला, प्रत्येक संघर्षाची स्वत:ची एक गोष्ट आहे. मात्र जो आवाज एकटा उठतो, तो अनेकदा दाबला जातो. त्यांनी म्हटले, ‘‘देशभरात लोक अन्यायाविरोधात आवाज उठवत आहेत. विरोधी पक्षनेता म्हणून तुमची लढाई ही माझी लढाई आहे. आता नव्या सत्याग्रहाची वेळ आहे. तुम्ही कोणत्या मुद्यांसाठी संघर्ष करत आहात, ते मला सांगा. मी तुमचे म्हणणे ऐकत आहे.’’
काँग्रेस नेत्यांचे म्हणणे आहे की, ‘सत्याग्रह’ हा या सर्व आवाजांना एका मंचावर एकत्र आणण्याचा उपक्रम आहे. राहुल गांधींनी लोकांना आवाहन केले की, जर ते कोणत्याही अन्यायाविरोधात लढत असतील, तर त्यांनी आपली गोष्ट या मंचावर शेअर करावी. त्यांनी म्हटले, ‘तुमच्यासारखे आणखी कोण-कोण लढत आहेत, हे तुम्ही पाहाल. आणि मी जे काही करू शकतो, ते करेन – संसदेत, रस्त्यावर, पत्र लिहून, जिथे जिथे माझी गरज असेल तिथे तुमच्यासोबत उभे राहून – विरोधी पक्षनेता म्हणून ही माझी जबाबदारी आहे. त्यांचे म्हणणे आहे की, या मंचाच्या माध्यमातून लोक आपली ओळख, आपले मुद्दे आणि त्यांच्या हक्कांच्या मार्गात उभ्या असलेल्या आव्हानांची माहिती शेअर करू शकतात.
प्रत्येक संघर्षाची स्वत:ची एक कहाणी
एकट्याने उठणारा आवाज अनेकदा दाबला जातो. ‘सत्याग्रह’ हा या सर्व आवाजांना एका नकाशावर एकत्र आणण्याचा एक उपक्रम आहे. महात्मा गांधींच्या विचारांचा संदर्भ देत राहुल गांधी म्हणाले की, बापूंनी सत्याग्रहाचा मार्ग दाखवला. ते म्हणाले की सत्य हे सर्वांत मोठे शस्त्र आहे, परंतु सत्यासोबत एकजूट होऊन उभे राहणे ही त्याहूनही मोठी शक्ती आहे. त्यांनी अन्यायाविरुद्ध संघर्ष करणा-या लोकांना आपल्या कथा सांगण्याचे आवाहन केले.
विरोधाला आवाज देणे हा उद्देश
राहुल गांधींनी म्हटले, संपूर्ण देशात सत्य दाबले जात आहे. देशाच्या वेगवेगळ्या भागांमध्ये अनेक विरोध प्रदर्शने होत आहेत. कुठे जमिनीसाठी, कुठे महिलांच्या हक्कांसाठी, कुठे दलित आणि ओबीसींच्या हक्कांसाठी, तर कुठे शिक्षण आणि परीक्षांबाबत. आम्हाला या सर्व आंदोलनांना संघटित करायचे आहे, त्यांना एका मंचावर एकत्र आणायचे आहे आणि तुमच्यासोबत मिळून तुम्ही ज्या लढ्यासाठी उभे आहात, तो सोडवण्यासाठी आम्ही तुमची कशी मदत करू शकतो, हे पाहण्यात मदत करायची आहे.
