दिग्दर्शक नितेश तिवारी यांच्या बहुप्रतिक्षित ‘रामायण: पार्ट १’ या महाकाय चित्रपटाचा पहिला अधिकृत ट्रेलर रिलीज होताच संपूर्ण इंटरनेटवर आणि सोशल मीडियावर केवळ याच सिनेमाची चर्चा रंगली आहे. नमित मल्होत्रा निर्मित या चित्रपटाची गेल्या अनेक महिन्यांपासून जोरदार उत्सुकता होती. ब्रह्ममुहूर्तावर पाच वेगवेगळ्या भाषांमध्ये प्रदर्शित झालेल्या या ट्रेलरने प्रेक्षकांचे लक्ष वेधून घेतले आहे. चार मिनिटांपेक्षा जास्त कालावधीच्या या ट्रेलरमध्ये भारतीय चित्रपटसृष्टीतील भव्यता आणि आधुनिक तंत्रज्ञानाचा सुरेख संगम पाहायला मिळत असून, प्रदर्शित होताच सिनेप्रेमींमध्ये प्रचंड उत्सुकता निर्माण झाली आहे.
ट्रेलरमधील सर्वात महत्त्वाची आणि आकर्षक गोष्ट म्हणजे अभिनेता रणबीर कपूरचा प्रभू श्रीरामांच्या भूमिकेतील शांत, संयमी पण तितकाच प्रभावशाली अवतार. “विश्व कल्याणासाठी माझा अंत जरी झाला तरी चालेल” या त्याच्या संवादाने प्रेक्षकांमध्ये एक वेगळीच भावना निर्माण केली आहे. तर दुसरीकडे, दाक्षिणात्य सुपरस्टार यशने साकारलेली रावणाची भूमिका आणि त्याचा रौद्र अवतार संपूर्ण ट्रेलरवर सावली पाडताना दिसतो. रावणाची ताकद, विद्वत्ता आणि त्याचा अहंकार या सर्व गोष्टी यशच्या व्यक्तिरेखेतून स्पष्टपणे जाणवतात. राम आणि रावण यांच्यातील संघर्षाची ही पहिली झलक प्रेक्षकांना भारावून टाकणारी ठरली आहे.
चित्रपटातील दृश्यात्मक भव्यता आणि आंतरराष्ट्रीय दर्जाचे व्हीएफएक्स तंत्रज्ञान हे या ट्रेलरचे आणखी एक मोठे वैशिष्ट्य ठरले आहे. त्रेतायुगातील वातावरणनिर्मिती, भव्य प्रासाद, सीता स्वयंवराचा देखावा आणि अरण्यवासाचे प्रसंग अत्यंत बारकाईने आणि वास्तववादी पद्धतीने पडद्यावर मांडण्यात आले आहेत. विजुअल इफेक्ट्सच्या माध्यमातून दाखवण्यात आलेले युद्धप्रसंग आणि पार्श्वसंगीत यामुळे हा सिनेमा भारतीय चित्रपटसृष्टीतील एक महत्त्वाचा टप्पा ठरेल असा विश्वास नेटकरी व्यक्त करत आहेत.
रणबीर आणि व्यतिरिक्त या चित्रपटातील स्टार कास्टची मोठी फळी प्रेक्षकांचे लक्ष वेधून घेत आहे. सीतेच्या भूमिकेत अभिनेत्री साई पल्लवीची साधेपणाने परिपूर्ण असलेली उपस्थिती, राजा दशरथाच्या भूमिकेत जुन्या ‘रामायण’ मालिकेतील प्रसिद्ध अभिनेते अरुण गोविल, कैकेयीच्या भूमिकेत लारा दत्ता, शूर्पणखेच्या भूमिकेत रकुल प्रीत सिंग आणि लक्ष्मणाच्या भूमिकेत रवी दुबे यांची झलक ट्रेलरमध्ये पाहायला मिळते. जुन्या आणि नव्या कलाकारांच्या या संगमामुळे कथेला एक विशेष वजन प्राप्त झाले आहे.
ट्रेलर प्रदर्शित झाल्यानंतर सोशल मीडियावर याबद्दल अत्यंत तीव्र आणि संमिश्र प्रतिक्रियांचा पूर आला आहे. काही नेटकऱ्यांनी राम आणि रावणाच्या पात्रांचे मनापासून कौतुक केले आहे, तर काहींनी पात्रांच्या वेशभूषेवर आणि आधुनिक दिसणाऱ्या लूकवर चर्चा सुरु केली आहे. विशेषतः स्त्रियांच्या पोशाखांवरून इंटरनेटवर विविध मीम्स आणि मते प्रसिद्ध होत आहेत. त्याचबरोबर हनुमानाच्या भूमिकेत दिसणाऱ्या सनी देओलची झलक या ट्रेलरमध्ये न दिसल्याने अनेक चाहत्यांनी उत्सुकतेपोटी प्रश्नही उपस्थित केले आहेत. एकंदरीत, कौतुक आणि चर्चांच्या या वातावरणात ‘रामायण’ चित्रपटाच्या ट्रेलरने इंटरनेटवर पूर्णपणे धुमाकूळ घातला आहे.
