नवी दिल्ली : संरक्षण मंत्री राजनाथ सिंह यांनी रविवारी पाकिस्तानबाबत म्हटले की, शेजारी देशाने दहशतवादाचे राज्य धोरण सुरूच ठेवले, तर भारत दहशतवादाविरोधात कोणत्याही प्रकारची कारवाई करण्यासाठी पूर्णपणे सज्ज आहे.
ते म्हणाले की, भारत आपल्या राष्ट्रीय सुरक्षेशी कोणत्याही परिस्थितीत तडजोड करणार नाही. भारताला दुस-या देशाच्या भूमीवर कब्जा करायचा नाही आणि कोणालाही धमकावायचेही नाही. नवी दिल्ली येथे आयोजित एनडीटीव्ही डिफेन्स समिट २०२६ मध्ये त्यांनी हे वक्तव्य केले. भारताच्या मोहिमा आणि इतर देशांसोबतचे सहकार्य नेहमीच राष्ट्रीय हित लक्षात घेऊन केले जाईल. भारताला मोहिमा हव्या आहेत, पण राष्ट्रीय हिताची किंमत मोजून नाही. भारताला सहकार्य हवे आहे, पण आपल्या धोरणात्मक स्वायत्ततेची किंमत मोजून नाही. थ्यूसीडाइड्स ट्रॅपची संकल्पना सांगते की, एखादा देश वेगाने उदयास येतो तेव्हा त्याचा आधीपासून शक्तिशाली असलेल्या देशांशी संघर्ष होऊ शकतो.
भारताकडे अशा द्विआधारी दृष्टिकोनातून पाहू नये. भारत ना यथास्थिती कायम ठेवणारी शक्ती आहे, ना विद्यमान व्यवस्था बदलणारी शक्ती; तो एक सभ्यतागत शक्ती आहे. पंतप्रधान मोदी यांनी शांघाय सहकार्य संघटनेच्या (एससीओ) शिखर परिषदेत दहशतवादाची संपूर्ण यंत्रणा उद्ध्वस्त करण्याची गरज व्यक्त केली होती. त्यांनी दहशतवादाला होणारा निधीपुरवठा, भरती, कट्टरतावाद आणि सुरक्षित आश्रयस्थानांविरोधात कारवाई करण्याची मागणी केली होती.
यूएनमध्येही पाकवर निशाणा
संयुक्त राष्ट्र महासभेत परराष्ट्रमंत्री एस. जयशंकर यांनीही दहशतवादाच्या मुद्यावरून पाकिस्तानवर निशाणा साधत भारताला दहशतवादापासून स्वत:चे रक्षण करण्याचा अधिकार असल्याचे म्हटले होते. ते म्हणाले होते की, दहशतवादासोबत मैत्री आणि सद्भावना एकाच वेळी टिकू शकत नाहीत.
पाणी रोखणे म्हणजे युद्धासारखे
पाकिस्तानचे पंतप्रधान शहबाज शरीफ यांनी २५ सप्टेंबर रोजी संयुक्त राष्ट्रांत भारताला युद्धाची धमकी दिली होती. भारताने सिंधू नदीचे पाणी रोखू नये, असे त्यांनी म्हटले होते. पाणी रोखण्याचा प्रयत्न पाकिस्तान युद्धाची कारवाई मानेल. शहबाज शरीफ यांनी वठ मध्ये काश्मीरचा मुद्दाही उपस्थित केला होता. शहबाज म्हणाले की, काश्मीर आमच्यासाठी मानेची नस आहे. काश्मीरचा मुद्दा उपस्थित केल्यावर वठ मध्ये भारताच्या फर्स्ट सेक्रेटरी पेटल गेहलोत यांनी म्हटले होते की, पाकिस्तानने बेकायदेशीर कब्जात असलेल्या काश्मीरची परिस्थिती पाहायला हवी.
