बिश्केक : रशियन राष्ट्राध्यक्ष व्लादिमीर पुतिन यांनी म्हटले आहे की, रशिया कधीही युरोपवर हल्ला करणार नाही. त्यांनी सांगितले की, जर युरोपला हवे असेल तर ते त्यांना लेखी आश्वासन देण्यास तयार आहेत. त्यांनी युरोपवर रशियन हल्ल्याची शक्यता पूर्णपणे निरर्थक असल्याचे म्हटले आहे.
पुतिन म्हणाले की, युरोपीय नेते केवळ शस्त्रे बनवणा-या कंपन्यांचे तळवे चाटत आहेत. ते आपल्या जनतेसाठी एक खोटा भ्रम निर्माण करू इच्छितात. यापूर्वी मंगळवारी जर्मनीचे परराष्ट्र मंत्री योहान वेडफुल यांनी आरोप केला होता की, रशिया पुढील चार वर्षांत कोणत्याही नाटो देशावर हल्ला करू शकतो. वेडफुल यांनी सांगितले होते की, जर्मन गुप्तचर संस्थांनुसार, रशिया २०२९ पर्यंत नाटोविरुद्ध युद्धाची तयारी करत आहे. पुतिन यांचे हे विधान अशा वेळी आले आहे, जेव्हा अमेरिका, युरोप आणि युक्रेन यांच्यात रशिया-युक्रेन युद्ध संपवण्यासाठी नवीन शांतता योजनेवर चर्चा सुरू आहे.
युक्रेनियन सैनिकांना माघार घ्यावी लागेल
पुतिन यांनी माध्यमांशी बोलताना सांगितले की, रशियाच्या ताब्यात असलेल्या भागातून युक्रेनच्या सैन्याला माघार घ्यावी लागेल. सध्या रशियाचा युक्रेनच्या १९% पेक्षा जास्त भागावर ताबा आहे. यापैकी बहुतेक भाग डोनबास आणि लुहान्स्क प्रांताचा आहे. पुतिन यांच्या मते, युद्ध थांबवण्यासाठी युक्रेनियन सैन्याला माघार घ्यावी लागेल. पुतिन यांनी स्पष्टपणे सांगितले की रशिया चर्चेसाठी तयार आहे, परंतु गरज पडल्यास लढाई सुरू ठेवण्याचा पर्यायही खुला आहे. त्यांनी इशारा दिला की जर ते मागे हटले नाहीत, तर आम्ही हे उद्दिष्ट लष्करी कारवाईने पूर्ण करू.
